• Educadores ambientais impartiron seis sesións formativas nas que participaron alumnos de educación primaria e nas que se incidiu na necesidade de poñer en práctica o principio dos tres erres: redución, reutilización e reciclaxe
• En termos xerais, coñecían os distintos contedores e a súa función, se ben o amarelo concentrou o maior número de dúbidas debido a que non todos os plásticos poden introducirse neste recipiente, senón unicamente os que son envases e envoltorios, ademais das latas e os briks​​​​​​​
• Algúns escolares manifestaron coñecer a autocompostaxe, xa que, na súa vivenda, de carácter unifamiliar e con terreo, dispoñen de composteiro para transformar os restos de alimentos e vexetais en abono que utilizan como fertilizante natural nas súas hortas e xardíns

Cerceda, a 3 de maio de 2023.- Educadores de Sogama desprazáronse á localidade pontevedresa de Nigrán para formar ao alumnado de primaria do CEIP Humberto Juanes na xestión sostible dos residuos municipais, incidindo no principio dos tres erres (redución, reutilización e reciclaxe).

En total, impartíronse seis sesións destinadas a un total de 300 escolares nas que se explicou a problemática representada pola alta produción de refugallos nas sociedades modernas, a importancia dun consumo responsable para minimizar a súa xeración, as posibilidades da reutilización para alongar a vida útil dos produtos e o papel fundamental que desempeña o cidadán na reciclaxe mediante a correcta separación de residuos en orixe e o seu posterior depósito nos contedores de recollida selectiva: amarelo, para envases de plástico, latas e briks; azul, para papel e cartón; iglú verde, para envases de vidro; contedor marrón -en proceso de implantación en Galicia- para materia orgánica, e xenérico, para a fracción resto. Con esta segregación facilítase o labor das plantas de clasificación e reciclaxe, posibilitando que os refugallos se convertan en novas materias primas e se reincorporen ao circuíto comercial, evitando o consumo de recursos naturais.

En termos xerais, os alumnos coñecían os distintos contedores e a súa función, se ben o amarelo concentrou o maior número de dúbidas debido a que non todos os plásticos poden introducirse neste recipiente, senón unicamente os que son envases e envoltorios, ademais das latas (de aceiro e aluminio) e os briks. Cando estes materiais chegan á planta de clasificación de Sogama, sepáranse mecanicamente a través de ciclóns aspiradores, lectores ópticos, electroimáns e correntes de Foucault. Cada tipoloxía de material prénsase e embálase para remitir ao correspondente centro reciclador.

O contido do contedor azul e iglú verde, unha vez recollido, remítese directamente desde os concellos aos recicladores. No caso da fracción resto, transpórtase ao Complexo Medioambiental de Sogama en Cerceda (A Coruña), onde se separa a parte susceptible de ser reciclada (con procesos similares aos da Planta de Clasificación de Envases) para remitir á industria transformadora, valorizando enerxeticamente a fracción non reciclable. De feito, a electricidade producida en Sogama equivale ao consumo enerxético do 12% dos fogares galegos.

O contedor marrón está concibido para acoller a materia orgánica e transformala en compost na planta de biorresiduos máis próxima.

Algúns escolares manifestaron coñecer a autocompostaxe, xa que na súa vivenda, de carácter unifamiliar e con terreo, dispoñen de composteiro para transformar os restos de alimentos e restos vexetais en abono que utilizan como fertilizante natural nas súas hortas e xardíns, pechando así o ciclo de valorización da materia orgánica. Todo un exemplo de economía circular.

Saúdos, Departamento de Comunicación