• Aberto para nenos e mozos con idades comprendidas entre os 5 e os 19 anos, os carteis deben simbolizar o prato ou receita favorita dos seus autores, e transmitir a importancia de alimentos diversos, nutritivos, inocuos e asequibles
• Os premiados serán promocionados polas oficinas da FAO en todo o mundo e recibirán un certificado e unha bolsa de regalo sorpresa

Cerceda, a 4 de novembro de 2024.- O vindeiro venres, 8 de novembro, conclúe o prazo para que nenos e mozos con idades comprendidas entre os 5 e os 19 anos presenten as súas propostas e creatividades ao concurso de carteis enmarcado no Día da Alimentación 2024 e promovido pola FAO (Organización das Nacións Unidas para a Alimentación e a Agricultura). Os carteis presentados deben simbolizar o prato ou receita favorita dos seus autores, e transmitir a importancia de alimentos diversos, nutritivos, inocuos e asequibles.

Bases

O concurso divídese en varias categorías: de 5 a 8 anos, de 9 a 12 anos, de 13 a 15 anos e de 16 a 19 anos de idade, e cada candidato pode presentar unicamente un cartel. No caso daqueles que acheguen máis dun, serán descalificados.

Os interesados deben tramitar a súa inscrición cumprimentando un formulario previsto a tal efecto no sitio web da FAO fao.org/worldfoodday-campaign/contest/upload-your-poster/é/. É necesario completar todos os campos e, unha vez que se teña subido o cartel (unicamente aceptaranse arquivos dixitais en formato JPEG), hai que facer clic no botón ENVIAR.

Os carteis pódense debuxar, pintar ou esbozar con bolígrafos, lapis de cores ou carboncillos, empregando pintura ao óleo, pintura acrílica ou acuarelas ou utilizando unha combinación de materiais. Tamén se poden deseñar dixitalmente, pero non se permiten fotografías.

Poden incluír texto ou non. Se se utiliza texto, non se aceptarán máis de 25 palabras ou 100 caracteres.

Todas as obras de arte deben ser orixinais e non  incluír logotipos ou imaxes fotográficas do concursante, ou outra información de carácter persoal.

Un xurado seleccionará tres gañadores de cada categoría de idade e anunciarao en decembro. Os premiados serán promocionados polas oficinas da FAO en todo o mundo e recibirán un certificado e unha bolsa de agasallo sorpresa.

Cando se publiquen os carteis gañadores, soamente se dará a coñecer a primeira inicial, o apelido completo e o país de orixe dos seus autores. Non se publicará nin se compartirá ningún outro dato persoal dos participantes.

Fonte e imaxe: FAO