Rede de infraestruturas para a valorización da materia orgánica
A rede de infraestruturas para a valorización da materia orgánica, impulsada pola Xunta de Galicia e executada por Sogama, contou cun investimento de 45 millóns de euros, dos cales 30 millóns procederon dos Fondos FEDER REACT EU como resposta da Unión Europea á crise do COVID-19.
Esta rede está conformada por 17 instalacións: 4 plantas de biorresiduos (unha por provincia) e 13 plantas de transferencia de apoio.
Plantas de biorresiduos
|
Cerceda (A Coruña) Capacidade para tratar 15.000 toneladas anuais de materia orgánica. |
|
|
Vilanova de Arousa (Pontevedra) Capacidade para tratar 15.000 toneladas anuais de materia orgánica e 7.000 toneladas de material estruturante (podas e restos de madeira). |
|
|
Cervo (Lugo) Capacidade para tratar 3.000 toneladas anuais de materia orgánica, ademais de 1.600 toneladas de material estruturante. |
|
|
Verín (Ourense) Capacidade para tratar 3.000 toneladas anuais de materia orgánica, ademais de 1.600 toneladas de material estruturante. |
|
As catro plantas de biorresiduos integran as distintas fases do proceso de compostaxe dos residuos orgánicos: desde o pretratamento e a fermentación, ata a maduración e o almacenamento, así coma os correspondentes tratamentos de aire e de augas, facendo uso en todo momento das últimas tecnoloxías dispoñibles, tanto de procesado como de control de cheiros e ruído. Desta forma, garántese en todos os casos unha actividade industrial respectuosa co medio ambiente e o benestar da cidadanía.
Ademais, unha parte das mesmas é autosuficiente desde o punto de vista enerxético ao dispoñer de paneis solares fotovoltaicos, contribuíndo desta forma á loita contra o cambio climático.
Plantas de transferencia de apoio
No caso das plantas de transferencia de apoio, 6 son de nova construción (A Lama e Arbo, na provincia de Pontevedra; Cee, Curtis e Ponteceso, na provincia da Coruña; e Riotorto, na de Lugo) e 7 foron sometidas a remodelación para adaptalas aos requisitos de xestión da materia orgánica. É o caso da de San Cibrao das Viñas e A Rúa, na provincia de Ourense; Silleda, O Porriño e Vigo, na de Pontevedra; Lugo (cidade); e Narón (na provincia da Coruña).
En todas elas, unha tolva específica acolle a materia orgánica recollida de forma diferenciada a través do contedor marrón e transvásaa a contedores de maior capacidade que inmediatamente a transportan ata a planta de biorresiduos máis próxima para a súa compostaxe.
Con este mapa de infraestruturas, o obxectivo da Xunta de Galicia é que a práctica totalidade dos concellos adheridos a Sogama (295) dispoñan dunha planta de biorresiduos ou de transferencia a menos de 50 quilómetros de distancia, circunstancia que, ademais de representar un aforro de custos para os entes locais, reforza o principio de proximidade na xestión de residuos, diminuíndo as emisións de CO2 ao verse reducido o transporte por estrada.
