- O obxectivo é desenvolver un instrumento internacional xuridicamente vinculante sobre a contaminación plástica, incluído o medio mariño (INC-3)
Cerceda, a 14 de novembro de 2023.– Onte inaugurouse en Nairobi (Kenia) a terceira sesión do Comité Intergobernamental de Negociación para desenvolver un instrumento internacional xuridicamente vinculante sobre a contaminación plástica, incluído o medio mariño (INC-3). Esta sesión segue a dúas roldas de negociacións anteriores: INC-1, que tivo lugar en Punta do Leste, Uruguai, en novembro de 2022, e INC-2, que se celebrou en París en xuño. Están previstas dúas sesións máis do INC para 2024.
Na apertura da sesión, o presidente de Kenia, William Ruto, manifestou que “Para facer fronte á contaminación plástica, a humanidade debe cambiar. Debemos cambiar a forma en que consumimos, a forma en que producimos e como eliminamos os nosos residuos. Esta é a realidade do noso mundo. O cambio é inevitable. Este tratado, este instrumento no que estamos a traballar, é a primeira peza do dominó. Levémolo a casa. Que comece o cambio”.
Pola súa banda, a Directora Executiva do Programa das Nacións Unidas para o Medio Ambiente (PNUMA), Inger Andersen, indicou que a resolución aprobada na UNEA 5.2 (a quinta Asemblea das Nacións Unidas para o Medio Ambiente en 2022) pediu un instrumento que se basea "nun enfoque integral que aborda o ciclo de vida completo do plástico; non é un instrumento que aborde a contaminación plástica unicamente mediante a reciclaxe ou a xestión de residuos, senón o ciclo de vida completo. Isto significa repensar todo ao longo da cadea, desde o polímero ata a contaminación, desde o produto ata a embalaxe”, ao que engadiu que “Necesitamos utilizar menos materiais virxes, menos plástico e ningún produto químico nocivo. Necesitamos asegurarnos de usar, reutilizar e reciclar os recursos de maneira máis eficiente, e dispoñer de forma segura do que sobra. E utilizar estas negociacións para perfeccionar un instrumento agudo e incisivo co que forxar un futuro mellor, libre de contaminación plástica”.
O presidente do INC, Gustavo Adolfo Meza-Cuadra Velásquez dixo ter a esperanza de que, ao final da sesión, o Comité acorde un mandato para un borrador revisado e un posible traballo entre sesións para preparar a cuarta e quinta sesións. "Estou seguro de que poderemos lograr avances substanciais aquí no noso terceiro período de sesións e aproveitar o espírito, o consenso e a ambición de Nairobi", salientou.
O inicio do INC-3 estivo precedido por unha reunión preparatoria o 11 de novembro, tamén en Nairobi, durante a cal os delegados participaron en intercambios iniciais informais de opinións, así como en consultas rexionais o 12 de novembro.
Fonte: ONU Medio Ambiente
Imaxe: Pexels
