• Pon como exemplo a Suecia e Noruega, que queren eliminar o imposto sobre a incineración, pretendendo con isto producir máis electricidade, non depender dos combustibles fósiles e reducir a vertedura
• A valorización enerxética dos residuos non reciclables implica a xeración de enerxía barata, autóctona, fiable e neutra
• A enerxía que se podería obter dos preto de 12 millóns de toneladas de refugallos que se depositan en vertedoiro en España sería de, aproximadamente, 7.800 GWh/ano, o equivalente ás necesidades de 2,25 millóns de fogares

Cerceda, a 13 de outubro de 2022.- A crise en Europa non só demostrou o expostos que estamos en materia de enerxía, senón que tamén existe un gran potencial non aproveitado no tratamento eficiente dos residuos. Segundo datos da Comisión Europea, 52 millóns de toneladas de residuos urbanos europeos foron a parar a vertedoiros en 2020, cifra que conleva importantes emisións de gases metano.

Ante a necesidade de achegar unha solución, os países escandinavos queren eliminar o imposto sobre a incineración. No caso de Suecia,  o goberno presentou unha proposta para suprimir a devandita taxa co fin de crear mellores condicións para producir máis electricidade e non depender dos combustibles fósiles. Pola súa banda, Noruega pediu eliminar este imposto aprobado a principios de 2022 – uns 20 euros por tonelada de CO2, ou uns 10 euros por tonelada de residuos que se incineran -.

Neste sentido, Aeversu, a Asociación Española de Empresas de Valorización Enerxética de Residuos Urbanos, apoia a visión dos países escandinavos para a eliminación dos impostos directos sobre a incineración de residuos. “Non cabe dúbida de que a eliminación destas taxas nesta zona terá un efecto global positivo sobre o medio ambiente. A longo prazo, reducirá a vertedura porque será máis barato utilizar máis residuos para a súa recuperación enerxética nas instalacións máis eficientes de Europa en lugar de envialos a un buraco coas consecuencias ambientais que iso conleva”, afirma Rafael Guinea, presidente de Aeversu. “Mentres en Suecia ou Noruega están a eliminar esta taxa mantendo ou subindo a da vertedura, en España estase a implantar. O coherente é manter só a taxa para o vertedoiro para fomentar a reciclaxe e a valorización, polo menos durante a actual crise enerxética”, argumenta.

ENERXÍA BARATA, AUTÓCTONA E FIABLE

A conversión en enerxía dos residuos non reciclables grazas á valorización implica a xeración de enerxía barata, autóctona, fiable e neutra. “Somos o país da UE que máis residuos destina a enterramento en vertedoiro, cada ano máis de 11,8 millóns de toneladas, e non se está a ter en conta o importante potencial da valorización enerxética para solucionar a crise enerxética”, lembra Guinea.

Concretamente, baseándose en cálculos realizados por Aeversu, o prezo medio da enerxía en 2022 foi de 232,46 €/MWh, isto suporía que o valor de mercado desa enerxía que se desperdicia nos vertedoiros sería de aproximadamente 1.808 M€/ano.

Considerando que  preto de 12 millóns de toneladas van a vertedoiro, a enerxía que se podería obter destes residuos sería de, aproximadamente, 7.800 GWh/ano, o equivalente ás necesidades de 2,25 millóns de fogares ou ao consumo de 5,5 millóns de persoas.

“Estamos a enterrar millóns de KWh de enerxía barata, autóctona, fiable e neutra, e a cambio compramos enerxía a prezos moi elevados, externa e fósil. A necesidade de reconsiderar esta opción é importante. Desde Aeversu vemos a necesidade de que España faga unha moratoria á taxa de incineración e manteña só a de vertedura. Temos que aproveitar a enerxía que estamos a desperdiciar”, conclúe Guinea.

Fonte: AEVERSU

Imaxe: Pixabay