• A través das mesmas, esta empresa pública pretende trasladar, tanto ao alumnado como ao profesorado, as nocións básicas vinculadas ao principio dos tres erres (redución, reutilización e reciclaxe) e explicar a actividade de Sogama en Galicia
• Na edición 2023-2024, participan neste programa, que ten por obxecto instaurar a recollida selectiva de residuos nas aulas e fomentar comportamentos e aptitudes responsables coa protección do medio ambiente, un total de 26 centros educativos das catro provincias

Cerceda, a 29 de xaneiro de 2024.- Arrincan nos 26 centros escolares adscritos ao programa “Recíclate con Sogama”, as sesións formativas presenciais a través das cales esta empresa pública pretende trasladar, tanto ao alumnado como ao profesorado, as nocións básicas vinculadas ao principio dos tres erres (redución, reutilización e reciclaxe).

Ademais de abundar na problemática que representa a elevada produción de residuos, proporciónanse as claves para consumir de forma responsable, para previr e reducir a xeración de refugallos, para alongar ao máximo a vida útil dos produtos e para separalos por tipoloxías en orixe co fin de que poidan ser reciclados. Neste sentido, insístese na relación de materiais que deben depositarse en cada contedor de recollida selectiva: amarelo, para envases de plástico, latas e briks; azul, para o papel e cartón; iglú verde, para o vidro; contedor marrón, para a materia orgánica; e xenérico, para a fracción resto ou non reciclable.

Así mesmo, explícase a actividade de Sogama, a infraestrutura coa que conta a Sociedade para dar servizo á maior parte do territorio galego, tendo en conta que atende a 295 concellos (o 94% do total de Galicia), e os proxectos, tanto de innovación como de educación ambiental, nos que está a traballar para optimizar as súas prestacións e mellorar o servizo público que presta a máis de 2,2 millóns de habitantes.

Presentacións, vídeos e xogos son, entre outros, os recursos que se utilizan nestas xornadas, aproveitadas por alumnos e profesores para consultar dúbidas e trasladar os seus comentarios e observacións.

O obxectivo último é que os pequenos interioricen os pasos a dar na xestión sostible dos residuos e que tamén leven a cabo unha tarefa educativa no seu ámbito máis próximo, tanto familiar como social.

“Recíclate con Sogama” alcanza a súa 13ª edición

Trátase dun programa de educación ambiental promovido por Sogama desde hai 13 anos e canalizado a través do Plan Proxecta da Xunta de Galicia, co que se pretende instaurar a recollida selectiva de residuos nas aulas e fomentar comportamentos e aptitudes responsables coa protección do medio ambiente.

Con tal fin, a empresa proporcionou a cada colexio participante unha illa de reciclaxe, conformada por catro contedores de 120 litros (amarelo, azul, marrón e verde xenérico) para que a comunidade educativa poida depositar nos mesmos os distintos tipos de residuos, contando para isto con material didáctico e divulgativo de apoio, tamén cedido por Sogama.

Cada centro debe abordar o seu proxecto de reciclaxe, que os educadores da compañía encárganse de supervisar, establecéndose para isto un calendario de visitas periódicas presenciais a través das cales a compañía efectúa un seguimento dos avances. Cara a finais de curso, unha das visitas centrarase en medir a calidade dos materiais depositados nos distintos contedores de recollida selectiva a través de caracterizacións, que arroxarán resultados sobre a porcentaxe de impropios, parámetro que será tido en conta na calificación final.

Concluído o curso, cada centro debe presentar unha memoria de actividades a través da aplicación informática do Plan Proxecta para que sexa avaliada.

Dos 26 centros participantes nesta iniciativa, 10 pertencen á provincia de Pontevedra, 5 á de Lugo, 4 á provincia da Coruña e 7 á de Ourense.

Centros seleccionados

Provincia de Pontevedra (10):

1. CEIP de Lourido (Poio)

2. CEIP Plurilingüe A Florida (Sanxenxo)

3. CEIP Valle Inclán (O Grove)

4. CEE de Vilagarcía de Arousa (Vilagarcía de Arousa)

5. CEIP Mestre Valverde Mayo (Mos)

6. CEIP de Atín-Cela (Mos)

7. CEIP Plurilingüe Pintor Laxeiro (Vigo)

8. CEIP Illas Cíes (Vigo)

9. CEIP Carlos Casares (Nigrán)

10. CEIP Marquesa do Pazo da Mercé (As Neves)

Provincia de Lugo (5):

11. CEIP Luís Pimentel (Lugo)

12.  CPI Plurilingüe Virxe do Monte (Cospeito)

13.  CEIP Plurilingüe Pedro Caselles Rollán (Xove)

14.  CEIP Plurilingüe Gregorio Sanz (Ribadeo)

15.  CEIP Plurilingüe O Corgo (O Corgo)

Provincia da Coruña (4):

16. CEIP Plurilingüe San Xoán de Filgueira (Ferrol)

17.  CPR Plurilingüe Santa Juana de Lestonnac (Ferrol)

18.  CEIP Plurilingüe de Andrade (Pontedeume)

19.  CPR Plurilingüe Compañía de María (Santiago)

Provincia de Ourense (7):

20. CEIP Plurilingüe Manuel Sueiro (Ourense)

21.  CPR Plurilingüe Divina Pastora (Ourense)

22.  CPR Plurilingüe Divina Pastora (O Barco de Valdeorras)

23.  CEIP Manuel Respino (A Rúa)

24.  CEIP Plurilingüe dás Vendas dá Barreira (Riós)

25.  CPR Plurilingüe María Inmaculada (Verín)

26.  CEIP Carlos Casares (Xinzo de Limia)

Saúdos, Departamento de Comunicación