• A eliminación progresiva de preto do 99 % das substancias prohibidas que esgotan a capa de ozono, logrou protexela e contribuíu a que se recupere de forma notable na estratosfera superior e a que diminúa a exposición das persoas á radiación ultravioleta (UV) nociva do sol

Cerceda, a 16 de xaneiro de 2023.- A capa de ozono está en camiño de recuperarse no próximos catro decenios. No informe de avaliación cuadrienal do Grupo de Avaliación Científica do Protocolo de Montreal relativo ás substancias que esgotan a capa de ozono, e apoiado polas Nacións Unidas, confírmase que a eliminación progresiva de preto do 99 % das substancias prohibidas ha logrado protexela e contribuíu a que se recupere de forma notable na estratosfera superior e a que diminúa a exposición das persoas á radiación ultravioleta (UV) nociva do sol.

Se se manteñen as políticas actuais, agárdase que a capa de ozono recupere os valores de 1980 (antes da conformación do buraco de ozono) aproximadamente en 2066 na Antártida, en 2045 no Ártico e en 2040 no resto do mundo.

As variacións no tamaño do buraco de ozono na Antártida, sobre todo entre 2019 e 2021, debéronse principalmente ás condicións meteorolóxicas. Con todo, cabe sinalar que a superficie e a profundidade do buraco de ozono diminuíu desde o ano 2000.

EFECTOS POSITIVOS NO CAMBIO CLIMÁTICO

O décimo informe do Grupo de Avaliación Científica confirma a repercusión positiva que o Tratado xa tivo no clima. A Emenda de Kigali ao Protocolo de Montreal, acordo adicional alcanzado en 2016, esixe a redución progresiva da produción e a utilización dalgúns hidrofluorocarbonos (HFC). Os HFC non esgotan directamente o ozono, pero son potentes gases de efecto invernadoiro. Segundo o Grupo de Avaliación Científica, esta emenda debería contribuír a evitar entre 0,3 e 0,5 °C de quecemento global de aquí a 2100 (non se inclúe a contribución das emisións de HFC-23).

“As medidas adoptadas en relación co ozono sentan un precedente para a acción climática. O éxito obtido grazas á eliminación progresiva das substancias químicas que destrúen a capa de ozono móstranos o que pode e debe facerse ―con carácter de urxencia― para abandonar os combustibles fósiles, reducir as emisións de gases de efecto invernadoiro e limitar, polo tanto, o aumento das temperaturas”, dixo o Secretario Xeral da Organización Meteorolóxica Mundial (OMM), o profesor Petteri Taalas.

A avaliación máis recente baséase en amplos estudos, investigacións e datos recompilados por un gran grupo internacional de expertos, moitos deles da OMM, o PNUMA, a Oficina Nacional de Administración Oceánica e Atmosférica (NOAA), a Administración Nacional de Aeronáutica e o Espazo (NASA) e a Unión Europea.

Fonte: ONU Medio Ambiente

Imaxe: Pixabay