• Este incremento veu dado polos continuos investimentos, estimados en máis de 1.750 millóns de euros
• Con máis de 730 plantas de reciclaxe, a capacidade total en EU27+3 ascende actualmente a 11,3 millóns de toneladas
• O sector da reciclaxe de plásticos é un importante xerador de emprego, con máis de 30.000 persoas en toda Europa, contribuíndo, con 8.700 millóns de euros de facturación, ao benestar socioeconómico do continente

Cerceda, a 14 de marzo de 2023.- Segundo os datos presentados por Plastics Recyclers Europe, a capacidade instalada de reciclaxe de plástico creceu un 17% en 2021 na UE27+3, e isto foi posible grazas ao impulso dado ao sector polos continuos investimentos, estimados en 1.750 millóns de euros. 

Ton Emans, Presidente de Plastics Recyclers Europe, asegurou que "Nos últimos anos, os recicladores de plásticos europeos enfrontáronse a moitos retos. Con todo, co aumento dos avances na lexislación, derivados da aplicación da Estratexia sobre Plásticos e a Directiva sobre plásticos dun só uso, a industria da reciclaxe capeou a crise demostrando a súa resistencia aos factores externos", ao que engadiu que “o crecemento positivo que podemos observar hoxe en día dará forma e reforzará aínda máis o mercado dos plásticos reciclados para cumprir os obxectivos da UE".

Con máis de 730 plantas de reciclaxe, a capacidade total en EU27+3 ascende actualmente a 11,3 millóns de toneladas, o que demostra que o sector da reciclaxe de plásticos é un importante xerador de emprego, con máis de 30.000 persoas en toda Europa, contribuíndo, con 8.700 millóns de euros de facturación, ao benestar socioeconómico do continente.

Alemaña, España, Italia, Reino Unido e Francia son os países con maior capacidade instalada, representando 2/3 do mercado total. Pola súa banda, Polonia e os Países Baixos son os que representan un crecemento máis notable.

 O aumento dos investimentos e as novas capacidades crearon unha base sólida para a transición cara á economía circular dos plásticos. A fin de seguir avanzando sobre esta base, é fundamental contar cun marco lexislativo coherente e a súa aplicación exhaustiva, xa que é un dos factores máis importantes que contribúen á demanda sen precedentes de materiais reciclados.

Esta transición acelerarase aínda máis grazas á recentemente publicada proposta de Regulamento sobre envases e residuos de envases, que avoga por un sistema de avaliación exhaustivo a escala da UE do deseño para a reciclaxe e establece obxectivos específicos de contido reciclado.

Fonte: Plastics Recyclers Europe

Imaxe: Pexels