• O Programa das Nacións Unidas para o Medio Ambiente anima á cidadanía a reconsiderar a súa forma de vida e pon como exemplo aos mozos emprendedores, que están mostrando o camiño cara a un estilo de vida máis sostible a través da creación de novos modelos de negocio.
• Tomar conciencia do que se compra, poñer freo á moda rápida, minimizar o consumo de envases plásticos, levar ao mercado a nosa propia bolsa reutilizable e prescindir dos desbotables son algunhas das recomendacións.

Cerceda, a 8 de xaneiro de 2020.- Agora que comezamos ano e nova década, é preciso facer unha pausa e reflexionar sobre os xestos e comportamentos a adoptar para axudar á protección da contorna.

Aínda que o consumo de bens aumenta exponencialmente por parte dalgunhas persoas, outras non teñen o esencial para vivir dignamente.

O Programa das Nacións Unidas para o Medio Ambiente (UNEP) anima á cidadanía a reconsiderar a súa forma de vida e pon como exemplo aos mozos emprendedores en todo o mundo, que están mostrando o camiño cara a un estilo de vida máis sostible a través da creación de novos modelos de negocio. É por isto que retoma as ideas da comunidade de gañadores e finalistas do premio Novos Campións da Terra de UNEP. Estas son algunhas:

1.- Sé consciente do que compras. Coñece como e onde se producen os produtos que consumes. Pregunta de onde provén a túa comida se non estás seguro. Opta polo uso de cuncas, vasos e vaixelas reutilizables para minimizar o refugallo innecesario de plástico.

Nalgunhas ocasións pode ser complicado identificar a pegada dos alimentos. A aplicación dixital Evocco, fundada polo Mozo Campión da Terra Hugh Weldon, de Irlanda, axuda a simplificar esta tarefa. A súa iniciativa ten como obxectivo educar ao usuario sobre o impacto ambiental da súa comida.

2.- Ponlle un freo á “moda rápida”. A industria da moda produce o 20% das augas residuais mundiais e o10% das emisións globais de carbono. Isto é máis que todos os voos internacionais e envíos marítimos combinados. Pero hai alternativas. Por exemplo, a liña de roupa 100% sostible Green Hug, fundada polo mozo mexicano Jorge Eduardo Lomeli Carrillo, que oferta prendas confeccionadas nun 50% con botellas de PET e nun 50% a partir de textis reciclados. En comparación coa roupa convencional, a empresa calcula que o seu impacto ambiental é un 90% menor.

3.- Adquire produtos de coidado persoal sen plástico. 51 billóns de microplásticos contaminan os nosos océanos e moitos artigos de carácter persoal son unha fonte importante destes diminutos plásticos, que poden chegar aos océanos a través dos nosos baños.

Existen alternativas sostibles. A libanesa Batoul O Hakim, finalista do premio Mozos Campións en 2018, fundou Savvy Element, unha compañía que ten como obxectivo deseñar solucións químicas seguras e ecolóxicas, e reducir o uso de sustancias daniñas que contribúen ás emisións e á xeración de refugallos perigosos.

4.- Leva a túa propia bolsa reutilizable se vas de compras. O mozo pionero Alhaji Siraji Bah, de Serra Leona, atopou a súa propia maneira de loitar contra as bolsas de plástico dun só uso: as bolsas de papel biodegradables e ecolóxicas, feitas a partir de follas de plátano. Ata a data, produciu máis de 250.000 sacos ecolóxicos.

5.- Di non aos cubertos e botellas desbotables. En todo o mundo, cada minuto cómprase un millón de botellas de plástico. Unha solución sinxela para este desafío é levar contigo o teu propio kit de utensilios cando viaxes ou saibas que comerás ou beberás fóra da túa casa ou oficina.

Fonte e imaxe: ONU Medio Ambiente

Saúdos, Departamento de Comunicación