• Hoxe conmemórase o Día Internacional para a Erradicación da Pobreza, visualizándose como unha oportunidade coa que recoñecer a loita diaria que libran as persoas que a sofren, para divulgar os seus problemas e para propiciar a súa participación nas decisións que afectan ás súas vidas e comunidades.
•  En todo o mundo, máis de 800 millóns de persoas aínda viven con menos de 1,25 dólares ao día e moitos carecen de acceso a alimentos, auga potable e saneamento axeitados, segundo datos do PNUD.
• A ONU recorda que todos debemos unirnos para acabar coa pobreza e a discriminación, para construír un futuro sostible no que se satisfagan as necesidades actuais sen comprometer a capacidade das xeracións futuras para satisfacer as súas.

Cerceda, a 17 de outubro de 2019.-  Hoxe conmemórase o Día Internacional para a Erradicación da Pobreza, unha efeméride que se remonta ao 17 de outubro de 1987, xornada na que cen mil persoas se congregaron na praza do Trocadero, en París, onde en 1948 se asinara a Declaración Universal dos Dereitos Humanos, para render homenaxe ás vítimas da pobreza extrema, a violencia e a fame.

Esta data constitúe unha oportunidade para recoñecer a loita diaria que libran as persoas que sufren a pobreza, para divulgar os seus problemas e para propiciar a súa participación nas decisións que afectan ás súas vidas e comunidades.

Así mesmo, cabe sinalar que este ano cúmprese o 30 aniversario da adopción da Convención sobre os Dereitos do Neno (CDNU). En particular, a Convención recoñece o dereito de cada neno a un nivel de vida axeitado para o seu desenvolvemento físico, mental, espiritual, moral e social. A pobreza prexudica o desenvolvemento dos nenos e, á súa vez, conduce a menores ingresos e saúde na idade adulta.

A xuízo de António Guterres, Secretario Xeral da ONU, “Unha das claves para acabar coa pobreza infantil é facer fronte á pobreza no fogar, que adoita ser onde se orixina. Aínda que o acceso a servizos sociais de calidade debe ser unha prioridade”.

En todo o mundo, máis de 800 millóns de persoas aínda viven con menos de 1,25 dólares ao día e moitos carecen de acceso a alimentos, auga potable e saneamento axeitados, segundo datos do Programa das Nacións Unidas para o Desenvolvemento (PNUD).

Fonte: ONU

Imaxe: Pixabay

Saúdos, Departamento de Comunicación