• Baixo o título “A educación ambiental na economía circular”, iniciarase o próximo 3 de febreiro e contará con 30 horas lectivas.
• Será impartido por dous técnicos de Sogama, a través do PLATEGA, e no mesmo participarán medio cento de docentes de educación infantil e primaria.
• O principal obxectivo desta actividade é que o profesorado tome conciencia da importancia que ten a educación ambiental para transitar cara a unha economía circular na que se prime o máximo aproveitamento dos produtos, a redución de residuos e a transformación destes en recursos.
• O curso está conformado por dez temas e cada un deles irá asociado a unha proba de avaliación tipo test a fin de comprobar e medir de forma obxectiva os coñecementos adquiridos polos alumnos/as.

Cerceda, a 28  de enero de 2020.-  A partir do próximo 3 de febreiro, e baixo o título “A educación ambiental na economía circular”, Sogama impartirá, a través do PLATEGA (Plataforma de Teleformación de Galicia) un curso online dirixido a medio cento de profesores de infantil e primaria dependentes da Xunta de Galicia.

O principal  obxectivo deste curso, que contará con 30 lectivas, é que os docentes tomen conciencia da importancia que ten a educación ambiental para transitar cara a unha economía circular na que se prime o máximo aproveitamento dos produtos, a redución de residuos e a transformación destes en recursos.

Así mesmo, daranse a coñecer as boas prácticas coas que contribuír a este modelo de desenvolvemento desde a loita contra o cambio climático, a conservación da biodiversidade, a xestión racional do lixo e o uso eficiente dos xa escasos e limitados recursos naturais.

 Igualmente, exporanse as técnicas, habilidades e estratexias propias do educador ambiental, así como a capacidade de extrapolalas a distintos campos de acción no ámbito académico.

PROGRAMA E AVALIACIÓN

O curso está conformado por un total de 10 temas:

1.- Educación ambiental: bases teóricas e marco lexislativo de referencia.

2.- A figura do educador ambiental: habilidades, aptitudes, funcións, transversalidade e boas prácticas.

3.-Economía circular: desenvolvemento futuro.

4.- Cambio climático: ameazas e plan de acción.

5.- Uso eficiente dos recursos naturais.

6.- Formación ambiental: consumidores conscientes, consecuentes e responsables.

7.- A contribución das ecoescolas ás boas prácticas ambientais e á convivencia harmoniosa coa contorna.

8.- Construíndo unha nova sociedade circular.

9.- Deseño de actividades ambientais e materiais didácticos de referencia.

10.- A educación ambiental no modelo Sogama

Os contidos a impartir serán complementados con materiais divulgativos de apoio e novas de actualidade.

Cada tema irá asociado a unha proba de avaliación tipo test a fin de comprobar e medir de forma obxectiva os coñecementos adquiridos.

Saúdos, Departamento de Comunicación