• Prevista para finais de 2025, coa mesma búscase impulsar a innovación, xerar empregos verdes e reforzar a sustentabilidade e competitividade da economía europea

Cerceda, a 2 de abril de 2025.- A Comisión Europea abriu unha consulta pública sobre a futura Estratexia de Bioeconomía, cuxo lanzamento oficial está previsto para finais de 2025, representando un paso crave para consolidar o liderado da UE no sector e promover un modelo económico máis sostible, innovador e competitivo.

A nova Estratexia proporá accións para aproveitar o potencial das innovacións en bioeconomía, de modo que poidan chegar ao mercado, xerando emprego verde e crecemento. Entre as súas prioridades inclúense as seguintes:

• Impulsar a innovación en bioeconomía.
• Reforzar a circularidade e a sostibilidade.
• Contribuír á descarbonización da economía europea.
• Crear condicións favorables para startups, emprendedores e novos modelos de negocio.

Ao respecto, a comisaria de Medio Ambiente, Resiliencia Hídrica e Economía Circular Competitiva, Jessika Roswall, afirmou que «debemos realizar un esforzo colectivo para construír unha bioeconomía próspera, sostible e circular. Esta consulta é unha canle crave para recompilar o maior número posible de ideas para dar forma á próxima Estratexia de Bioeconomía, que reflicta as necesidades e aspiracións da cidadanía, as empresas, os agricultores, os silvicultores e outras partes interesadas. Convido a todas as partes interesadas a contribuír.»

A estratexia estará aliñada con outra políticas clave da UE como a Brúxula de Competitividade, o Acordo Industrial Limpo, a próxima Estratexia de Ciencias da Vida, o Pacto polos Océanos e a Lei de Biotecnoloxía. Ademais, terá en conta a dimensión da competitividade global.

A consulta pública está dirixida a todos os axentes vinculados directa ou indirectamente coa bioeconomía: empresas, cidadáns, agricultores, silvicultores, institucións académicas e organizacións sociais.

A participación canalízase a través do portal Have Your Say, dispoñible en liña durante un período de 12 semanas, que finalizará o 23 de xuño de 2025.

Ademais da consulta dixital, os interesados poderán achegar as súas ideas en sesións específicas sobre bioeconomía organizadas en eventos europeos como:

• Diálogo de Actores da Economía Circular de ECESP – 10 de abril de 2025.
• Semana Verde da UE – do 3 ao 5 de xuño de 2025.

Fonte: fruittoday.com

Imaxe: Freepik