• Co lema «Protagoniza a transformación. É o momento», o congreso, que comeza hoxe e conclúe o próximo 24 de novembro
• Este ano inclúe tamén Conama Innova, unha contorna destinada á presentación de proxectos innovadores para a protección de biodiversidade, a aposta por cidades circulares e resilientes, e o desenvolvemento dunha industria sostible e conectada
• A oferta complétase coa área de stands, de 4.000 metros cadrados, e a exposición de comunicacións técnicas

Cerceda, a 21 de novembro de 2022.- Horas despois de clausurarse a COP 27, hoxe arrinca, baixo o lema “Protagoniza a transformación. É o momento”, a 16.ª edición do Congreso Nacional de Medio Ambiente no Pazo Municipal de Congresos IFEMA Madrid, coa pretensión de poñer sobre a mesa todas as problemáticas ambientais que preocupan e ameazan á sociedade.

Ata o próximo 24 de novembro, CONAMA 2022 converterase en punto de encontro do coñecemento, a experiencia e as propostas, cun ambicioso programa que recolle máis de cen actividades distribuídas en nove eixos temáticos (Enerxía e cambio climático, Mobilidade, Renovación urbana, Auga, Biodiversidade, Residuos, Desenvolvemento rural, Calidade ambiental e Economía e sociedade) nos que participarán 1.200 especialistas.

A xornada de hoxe acollerá unha vintena de actividades dedicadas a cuestións tales como a educación ambiental, o ecodeseño, os residuos téxtiles, as estratexias de biodiversidade, a mobilidade rural ou a gobernanza para a transición ecolóxica.

CONAMA 2022 recolle a reflexión do sector ambiental sobre as conclusións da COP27 de Sharm o Sheij (Exipto) e a posta en marcha de solucións conxuntas en temas coma o modelo de renovables a desenvolver, a rehabilitación enerxética e a descarbonización, a xestión e planificación da auga, os residuos e de que forma se pode garantir esta transición ecolóxica sen deixar a ninguén atrás.

VARIOS CONGRESOS NUN

O Congreso Nacional do Medio Ambiente, que se vén celebrando cada dous anos desde 1992, é o maior encontro ambiental do país. No mesmo danse cita milleiros de profesionais do sector público, empresarial e social vinculados aos eixos da sostibilidade referenciados.

Co lema da presente edición, quérese lanzar unha mensaxe á sociedade para acelerar a transición ecolóxica, xa que asistimos este ano a fenómenos climatolóxicos extremos: ondas de calor, secas ou inundacións, á vez que a ciencia consolidaba, cos seus informes, publicacións e estudos, a evidencia de que a relación da humanidade coa súa contorna é insostible.

O congreso tamén inclúe este ano Conama Innova, unha contorna destinada á presentación de proxectos innovadores para a protección de biodiversidade, a apost por cidades circulares e resilientes, e o desenvolvemento dunha industria sostible e conectada. Neste apartado impartiranse, ademais, talleres formativos e situarase a zona de Encontros B2B, concibida para que os profesionais poidan relacionarse e xerar proxectos conxuntos.

A oferta de CONAMA 2022 complétase coa área de stands, de 4.000 metros cadrados, e a exposición de comunicacións técnicas, onde se mostran preto de 250 investigacións e proxectos innovadores ao congreso polos seus autores.

SOBRE CONAMA

O Congreso Nacional do Medio Ambiente é organizado pola Fundación Conama, entidade independente dedicada a promover redes de colaboración sobre medio ambiente. CONAMA xera alianzas entre os gobernos, o sector privado e a sociedade civil, creando espazos de encontro e debate, e contribuíndo á creación de coñecemento compartido e solucións á crise climática.

O congreso é un foro neutral onde coinciden empresas, administracións, universidades e centros de investigación, ONG, fundacións e profesionais independentes. Todos eles participan durante meses na definición dos temas e os enfoques que se abordan, o que permite que o congreso faga aflorar as cuestións que máis preocupan ao sector ambiental e que se xeren redes e grupos de traballo que continúan o seu labor ao longo dos anos ao redor de Conama.

Fonte e imaxe: CONAMA