![¡Corta por lo sano! Reduce residuos, campaña de Sogama enmarcada en la Semana Europea de la Prevención ¡Corta por lo sano! Reduce residuos, campaña de Sogama enmarcada en la Semana Europea de la Prevención](/sites/default/files/noticias/image/2022-08/Imagen%2520def_0.jpg)
- A iniciativa, que se levará a cabo entre o 16 e o 24 de novembro, incluirá actividades presenciais e online co obxectivo de seguir contribuíndo á formación dos cidadáns no consumo responsable e a menor xeración de refugallos en orixe.
- Educadores ao servizo desta empresa pública impartirán sesións de sensibilización en distintos concellos, estando dirixidas de forma prioritaria ás asociacións veciñais.
- Os asistentes serán obsequiados con diverso material divulgativo e de merchandising.
- A nivel escolar, farase chegar aos centros educativos de primaria e secundaria unha presentación dinámica e interactiva na que se recollen consellos e recomendacións para a aplicación diaria e efectiva do principio europeo dos tres erres.
Cerceda, a 15 de novembro de 2019.- Como vén sendo habitual, Sogama participará, un ano máis, na Semana Europea da Prevención de Residuos, que nesta ocasión terá lugar entre o 16 e o 24 de novembro e centrarase específicamente na comunicación e a educación.
Farao coa súa iniciativa “Corta polo san! Reduce Residuos”, na que se incluirán actividades presenciais e online co obxectivo de seguir contribuíndo á formación dos cidadáns no consumo responsable e a menor xeración de refugallos en orixe.
PÚBLICO OBXECTIVO: ASOCIACIÓNS VECIÑAIS E ESCOLARES
Así, a empresa pública impartirá sesións de sensibilización en distintos concellos, estando dirixidas de forma prioritaria a asociacións veciñais, a quen se explicará a importancia de adquirir unicamente o necesario, de alongar a vida útil dos produtos e de separar correctamente os refugallos no fogar e depositalos nos contedores correspondentes a fin de propiciar o seu posterior reciclado.
Trasladaranse igualmente exemplos de boas prácticas coas que minorar a produción de residuos na compra, o fogar, o traballo e o tempo de lecer, prestando especial atención á diminución do desperdicio alimentario.
Tamén se falará da compostaxe da materia orgánica, toda vez que esta representa aproximadamente o 42% da composición dunha bolsa de lixo tipo e da contaminación por plásticos, resultando prioritario prescindir dos plásticos de usar e tirar e optar por alternativas máis ecolóxicas e sostibles.
Tralas exposicións realizadas polos monitores, que estarán apoiadas con diferentes recursos didácticos e divulgativos, reservarase un espazo para o coloquio, o intercambio de coñecementos e opinións, así como a consulta de dúbidas.
Os veciños que asistan a estas xornadas formativas serán obsequiados con distintos materiais divulgativos e de merchandising.
Xa no ámbito escolar, farase chegar aos centros educativos de primaria e secundaria unha presentación dinámica e interactiva na que se aportan, dunha forma amena e lúdica, recomendaciones e consellos para a aplicación diaria e efectiva do principio dos tres erres (redución, reutilización e reciclaxe).
Esta ferramenta pedagóxica tamén estará a disposición dos internautas na páxina web da compañía www.sogama.gal e nas súas redes sociais.
http://www.sogama.gal/gl/campanha/corta-polo-san-reduce-residuos
Saúdos, Departamento de Comunicación