• Trátase dun proxecto europeo que, baixo o acrónimo “Barbara”, enmárcase dentro do Programa Marco de Investigación e Innovación Horizonte 2020 da Unión Europea e conta cun orzamento de 2,7 millóns de euros.
• Investigadores da UA, en colaboración cunha decena de socios europeos, extraeron compostos naturais de restos de limón, granada, brócoli e améndoa que se introduciron en bobinas de filamentos para a impresión 3D de tiradores de portas e salpicadeiros con características melloradas e propiedades estéticas específicas.

Cerceda, a 7 de xaneiro de 2020.- No marco do proxecto europeo “Barbara”, que se atopa en fase de verificación e validación, investigadores da Universidade de Alicante (UA), en colaboración cunha decena de socios europeos, desenvolveron compostos naturais de alto valor engadido para as industrias da automoción e a construción a partir de residuos agrícolas de limón, granada, brócoli e casca de améndoa.

Os residuos agrícolas seleccionados estiveron determinados polas súas propiedades naturais. Os colorantes do limón, o brócoli e a granada permitiron obter gamas de cores distintas aos sintéticos. O aceite esencial do limón aporta propiedades antimicrobianas e desprende un olor agradable, característica de interese para algunhas industrias. Pola súa banda, a casca de améndoa proporciona un aspecto similar á madeira e mellora as propiedades mecánicas do material.

Unha vez extraídos os compostos naturais dos restos de limón, granada, brócoli e améndoa, introducíronse, a escala de laboratorio, en bobinas de filamentos para a impresión 3D de tiradores de portas e salpicadeiros con características melloradas e propiedades estéticas específicas.

O método de extracción e funcionalización das sustancias naturais foi desenvolvido polo Grupo de investigación de Análise de Polímeros e Nanomateriais (Nanobiopol) e o Grupo de Visión e Cor da UA. Outros socios do proxecto traballaron con residuos de amidón procedentes do millo para obter materiais de construción máis resistentes e reforzados.

ORZAMENTO E SOCIOS

Coordinado polo Centro Tecnolóxico Aitiip e monitorizado pola Universidade Italiana Di Perugia, o proxecto Barbara, que finalizará o próximo mes de abril, conta cun amplo equipo de dez socios de España, Italia, Suecia e Bélxica que abarcan todos os sectores relacionados co proxecto.

Cun orzamento de 2,7 millóns de euros, Barbara enmárcase dentro do Programa Marco de Investigación e Innovación Horizonte 2020 da Unión Europea.

Con esta iniciativa contribúese a unha nova xeración de industria aplicada ao medio ambiente, onde se promovan procesos de extracción máis ecolóxicos, reducindo potencialmente o consumo de enerxía e de materiais.

Fonte e imaxe: Universidade de Alicante (UA)

Saúdos, Departamento de Comunicación