• Dous grupos de investigación da UCO son os autores do traballo, no que tamén participou o Centro de Investigación de Polímeros Avanzados (CIPA) de Chile.
• Os resultados obtidos ofrecen unhas características moi similares ás xeradas polos métodos convencionais de fabricación nos que se usan compostos non renovables.
• Se ben estas novas espumas de poliuretano poderían ter infinidade de aplicacións, nunha segunda fase do estudo empregaranse en viveiros de plantas como soporte para o crecemento destas.

Cerceda, a 5 de febreiro de 2021.- Cada ano prodúcense no mundo ao redor de 734 millóns de toneladas de palla de trigo, un residuo abundante, barato e sen unha aplicación ben definida ata a data.

Agora, os grupos de investigación RNM-271 Enxeñería Química e FQM-383 NANOVAL da Universidade de Córdoba conseguiron dar unha nova saída a este sobrante agrícola, utilizándoo como base para a elaboración de espumas de poliuretano. 

Tamén coñecido coloquialmente como gomaespuma, este material plástico, fabricado a miúdo a partir de produtos derivados do petróleo, posúe unha gran versatilidade na industria e ten múltiples usos no sector da construción e automoción como sellador, aislante térmico e acústico. 

O novo traballo, publicado na portada da revista Polymers, e no que tamén participou o Centro de Investigación de Polímeros Avanzados (CIPA) de Chile, deu unha segunda vida a estes residuos de trigo, a partir dos cales, e mediante un proceso de licuefacción, conseguiuse obter polioles, un dos compostos clave que participan na reacción química que xera as espumas de poliuretano. 

Ata a data, o aceite de ricino foi un dos principais candidatos na carreira pola obtención dunha espuma de poliuretano sostible capaz de prescindir do petróleo. O problema, tal e como explica unha das autoras principais da investigación, Esther Rincón, é que este aceite vexetal "non ofrece un endurecemento e secado completo cando se expón ao aire", unha das claves para a correcta formación da gomaespuma. 

Por iso, o novo traballo propuxo substituír ao 50% este aceite de ricino por palla de trigo, cuns resultados que ofrecen unhas características moi similares ás xeradas polos métodos convencionais de fabricación nos que se usan compostos non renovables.

Se ben estas novas espumas de poliuretano poderían ter unha gran infinidade de aplicacións e ata fabricarse con outro tipo de biomasa, nunha segunda fase do estudo empregaranse en viveiros de plantas como soporte para o crecemento destas. "En lugar de regar a planta, e co obxectivo de evitar problemas de seca ou exceso de rego, inxectariamos a auga na espuma para que a planta a tome conforme a necesite", destaca a investigadora. 

Fonte: quimica.es/noticias (Universidade de Córdoba)

Imaxe: Pexels