- Esta cifra representa un incremento do 2,8% sobre o exercicio anterior, a pesar do negativo impacto da Covid-19
Cerceda, a 11 de marzo de 2021.- Malia o negativo impacto da Covid-19 e as súas graves consecuencias para a meirande parte dos sectores, a Fundación Ecotic, entidade sen ánimo de lucro dedicada á reciclaxe de residuos de aparellos eléctricos e electrónicos (RAEE), financiou e xestionou en 2020 un total de 114.800 toneladas de refugallos a través do seu Sistema Colectivo de Responsabilidade Ampliada do Produtor (SCRAP), cifra que representa un incremento do 2,8% respecto dos resultados de 2019.
Por orixe, os residuos procedentes do ámbito doméstico experimentaron un crecemento do 1,6% ata alcanzar as 104.025 toneladas. Os principais incrementos foron o 9% rexistrado na categoría 2 (monitores, pantallas e aparellos con pantallas de superficie superior aos 100 cm2) e o 8% na categoría 1 (aparellos de intercambio de temperatura).
As recollidas provenientes de puntos limpos representaron o 32% do total, mentres que a distribución continuou sendo a principal canle de recollida, arroxando cifras moi similares ás rexistradas nos anos precedentes.
Como xa acontecera en 2019, o maior incremento das cantidades de RAEE recollidas tivo lugar nos residuos do ámbito profesional, que se elevaron ata as 10.775 toneladas, o que supón un aumento do 15,6%. A categoría 4, correspondente a grandes aparellos con dimensión exterior superior a 50 centímetros, destaca cun importante crecemento do 32%.
Así mesmo, o volume de aparellos destinados a preparación para a reutilización, foi de 5.000 toneladas destinadas a este fin ao longo dos dous últimos exercicios, sendo a categoría 6, correspondente aos aparellos de informática e telecomunicacións pequenos, a protagonista neste ámbito.
REACTIVACIÓN
Andreu Vilà, director xeral de Ecotic, sinalou que a declaración do estado de alarma e o conseguinte peche xeneralizado de puntos limpos e comercios de electrodomésticos, principais canles de recollida dos RAEE, orixinou unha menor distribución de aparellos e dificultou de forma notable a canalización dos residuos. “Tras a reactivación da actividade, os niveis recuperáronse con gran rapidez, e grazas ao enorme compromiso e o esforzo de todo o equipo de Ecotic, logramos manter uns niveis de servizo normalizado, minimizar o impacto destas dificultades e lograr un resultado mesmo lixeiramente superior ao de 2019”, subliñou.
En canto ás perspectivas para o exercicio 2021, que estarán determinadas pola evolución da pandemia, a entidade manterá a súa aposta por “seguir achegando servizos de valor engadido a produtores, distribuidores e instaladores, e impulsando iniciativas específicas de sensibilización e recollida como a actual campaña Dixitalización Sostible, que están a levar a cabo con fins solidarios xunto aos principais SCRAP da Oficina de Coordinación OfiRaee, a Fundación CEOE e outras entidades”.
Fonte: Ecotic
Imaxe: Pexels
