![España podría superar el objetivo de reciclado de envases de aluminio previsto por la UE para 2030 España podría superar el objetivo de reciclado de envases de aluminio previsto por la UE para 2030](/sites/default/files/noticias/image/2022-08/Latas_Pexels.jpg)
- Así o asegura un estudo encargado á consultora Virtus por parte de Arpal e a Asociación de Latas de Bebidas.
- Este obxectivo alcanzaríase implantando unha serie de medidas que, ademais, serían economicamente rendibles.
- O alto valor do aluminio permitiría recuperar os investimentos necesarios nuns prazos moi curtos, que se sitúan ao redor de 5 anos.
Cerceda, a 25 de xaneiro de 2021. Os envases de aluminio poden ser reciclados unha e outra vez, constituíndo un claro exemplo de economía circular. Isto permitiulles, en 2019, superar xa o obxectivo establecido pola Unión Europea para 2025 (50%) e prepáranse para alcanzar, e ata superar, o previsto para 2030 (60%).
Un estudo encargado a Virtus por Arpal e a Asociación de Latas de Bebidas, realizado en colaboración con Asplarsem, Aeversu e Ecoembes, asegura que España cumprirá ampliamente con ese obxectivo de reciclado do 60% a través da implantación dunha serie de medidas que, ademais, son rendibles economicamente. O alto valor deste material permitiría recuperar os investimentos necesarios nuns prazos moi curtos, que se sitúan ao redor de 5 anos.
A ferramenta máis eficaz é incrementar e reforzar as campañas de sensibilización para que o cidadán participe de forma activa na recollida selectiva municipal depositando os seus envases e embalaxes de aluminio no contedor amarelo a fin de propiciar o seu posterior reciclado.
Outras medidas identificadas no estudo consisten en modificacións industriais nas plantas de selección de residuos (tanto manuais como automáticas) e de envases lixeiros, así como nas plantas de valorización enerxética.
A ampliación e mellora dos separadores de Foucault existentes nas devanditas instalacións permiten incrementar a recuperación de envases de aluminio, así como obter un retorno económico en prazos que roldan os 5 anos, dependendo do volume de tratamento. Tamén se identifican oportunidades con outras tecnoloxías como os separadores de infrarroxos ou Raios-X.
Evitar o vertido directo dos residuos facendo que estes sexan tratados, ademais dunha esixencia legal, é outro factor que incrementaría a recuperación de envases de aluminio. Isto requiriría a construción de novas plantas ou a ampliación das xa existentes.
Segundo o estudo de Virtus, case 15.000 toneladas de envases domésticos de aluminio poderían recuperarse para o seu reciclado mediante melloras nas instalacións existentes.
Fontes: Arpal (www.aluminio.org) e Asociación de Latas de Bebidas (www.latasdebebidas.org)
Imaxe: Pexels