• A organización europea de tecnoloxías de conversión de residuos en enerxía afirma que a metade das emisións deste sector son bioxénicas, polo que se axustarían parcialmente á proposta da Comisión Europea

Cerceda, a 9 de decembro de 2022.- A Asociación Europea de Tecnoloxías de Valorización Enerxética, ESWET, sinala que a conversión de residuos en enerxía debería incluírse na certificación da eliminación de carbono debido á súa proporción de emisións bioxénicas.

Nun comunicado, a organización abunda en que a función principal das plantas WtE é o tratamento seguro dos residuos non reciclables, o que significa que o sector non ten a opción de cambiar de combustible. É por isto que as tecnoloxías de captura, utilización e almacenamento de carbono (CCUS) representa unha importante oportunidade para que o sector se descarbonice.

Así mesmo, asegura que a certificación da eliminación de carbono proposta pola Comisión é un primeiro paso positivo no despregamento de toda a cadea de valor de CCUS en Europa e que unha definición clara de «eliminación de carbono» é esencial para desenvolver un marco global, que tamén pode facilitar o seguimento das eliminacións.

Debido á natureza heteroxénea da súa materia prima, a conversión de residuos en enerxía emite aproximadamente o 50% do CO2 bioxénico, pero esta porcentaxe pode ser maior dependendo da rexión, o período de tempo, etc. En consecuencia, a eliminación de carbono das plantas WtE axustaríase parcialmente á definición proposta pola Comisión.

Con todo, para garantir a certificación das eliminacións de CO2 destas instalacións, é importante contar con normas claras de seguimento e contabilización das emisións que reflictan as particularidades deste sector. Ademais, dado que os requisitos de seguimento que se decidan no marco do Mecanismo de Eliminación de Carbono poden solaparse potencialmente co Sistema de Comercio de Emisións da UE (ETS), a articulación entre ambos os dous sistemas debe deseñarse coidadosamente.

ESWET indica que o recoñecemento do almacenamento de CO2 en «produtos e materiais duradeiros» constitúe un bo comezo, pero é esencial recoñecer todo o espectro de utilización do CO2 bioxénico, coma o uso directo en invernadoiros para substituír o CO2 fósil, a utilización no sector químico e tecnoloxías prometedoras como a mineralización.

A contribución completa da utilización do carbono á economía circular non debe pasarse por alto, conclúe a organización.

Fonte e imaxe: ESWET