• Avoga por obxectivos obrigatorios de contido reciclado, incentivos económicos e criterios de reciclabilidade para mellorar a capacidade de reciclaxe, ademais de lograr un equilibrio entre medidas precautorias e  unha xestión responsable de riscos para a economía circular
• Considera que resulta máis necesario que nunca establecer criterios harmonizados a nivel europeo da condición de fin de residuo para os plásticos, facilitando con isto a reincorporación de produtos reciclados de alta calidade en novos produtos

Cerceda, a 6 de decembro de 2024.- A división de Reciclaxe de Plásticos de EuRIC (EPRB) publicou unha folla de roteiro sobre o futuro da industria europea de reciclaxe de plástico, que actualmente enfronta unha demanda extremadamente baixa de materiais reciclados, ademais dunha competencia desleal por parte de terceiros países que ameazan a circularidade en Europa.

Na súa folla de roteiro, a EPRB de EuRIC (Confederación Europea de Industrias da Reciclaxe) avoga pola pronta implementación de obxectivos obrigatorios de contido reciclado para os plásticos, co fin de estimular a demanda e fomentar investimentos que aumenten a capacidade de reciclaxe en todo o continente. Así mesmo, propón incentivos, xa sexan fiscais ou baseados no mercado, para reducir a brecha de prezo entre os plásticos virxes e os reciclados.

Considera que, para garantir a produción de materiais reciclados de alta calidade, resulta esencial o establecemento de obxectivos obrigatorios de recollida e de criterios de reciclabilidade que melloren a cantidade e calidade dos insumos nos procesos de reciclaxe. Así mesmo, entende que resulta crucial lograr un equilibrio axeitado entre medidas precautorias e unha xestión responsable de riscos para a economía circular, xa que as actividades de reciclaxe poderían cesar se se establecen valores límite desproporcionados sen un método analítico harmonizado dispoñible a escala industrial que permita demostrar o cumprimento.

Coas novas restricións ás exportacións de residuos plásticos introducidas polo Regulamento de Transporte de Residuos, é imperativo contar cun mercado único ben estruturado para os plásticos reciclados dentro da Unión Europea. Por iso, resulta máis necesario que nunca establecer criterios harmonizados a nivel europeo da condición de fin de residuo para os plásticos, co obxectivo de facilitar a reincorporación de produtos reciclados de alta calidade en novos produtos.

"A baixa demanda de plásticos reciclados e as importacións baratas procedentes de terceiros países con baixos estándares ambientais e de seguridade ameazan o crecemento e a competitividade da industria europea de reciclaxe de plásticos. Para protexela, necesitamos medidas políticas decisivas e audaces que apoien xenuinamente a unha das industrias crave de Europa na transición cara a unha economía circular e neutra en carbono”, afirmou Julia Ettinger, Secretaria Xeral de EuRIC.

Fonte: EuRIC

Imaxe: Pixabay