• Felicitación de Nadal do presidente de Sogama, Javier Domínguez Lino

A piques de finalizar este ano 2023, que foi especialmente intenso para Sogama, despedímolo con esa grata sensación do deber cumprido, borrando da nosa memoria o traballo contrarreloxo, e sen descanso, que levamos a cabo para deixar a Galicia un importante legado co que axudaremos aos Concellos a cumprir a lei: 17 infraestruturas, estratexicamente situadas polo conxunto do territorio, para valorizar a materia orgánica mediante a súa transformación en compost.

Con isto pechamos o círculo que empezamos a debuxar hai uns anos para que os residuos se convertan en recursos, contribuíndo á transición que a nosa comunidade xa está a facer cara á economía circular.

Queremos seguir nesta liña e ir moito máis aló para lograr un verdadeiro desenvolvemento sostible que propicie unha maior protección ambiental, un crecemento económico e, por suposto, un progreso social.

É por isto que seguimos tendendo a nosa man aos cidadáns que habitan nesta extraordinaria terra, dos que necesitamos o seu apoio e colaboración, para facer de Galicia ese marabilloso lugar no que os soños cunha vida mellor pódense facer, e de feito fanse, realidade.

Felices Festas e Próspero Ano 2024!

Presidente

Javier Domínguez Lino