• O certame enmárcase no programa “Recíclate con Sogama” 2022-2023, no que este centro participa, xunto con outros 19 de distintos puntos de Galicia

• Baixo o lema “Se un bo planeta queres ter, reciclar é o que tes que facer”, o traballo do colexio ourensán pretendía transmitir que, dada a elevada xeración de refugallos, a reciclaxe constitúe un hábito imprescindible para poder gozar dunha contorna limpa e saudable
• Como terceiro clasificado, o colexio Divina Pastora, ademais do diploma correspondente, recibiu de Sogama unha dotación económica de 700 euros, que deberá destinar a material e/ou accións educativas

Cerceda, a 19 de xuño de 2023.- O presidente de Sogama, Javier Domínguez Lino, no marco dunha visita que o Colexio Plurilingüe Divina Pastora-MM Franciscanas de Ourense realizou en días pasados ao Complexo Medioambiental de Sogama en Cerceda (A Coruña), entregou a este centro o terceiro premio (diploma acreditativo e dotación económica de 700 euros para material e/ou accións educativas) polo seu cartel promocional da reciclaxe, que concurriu a un certame contemplado no programa educativo “Recíclate con Sogama” 2022-2023,

Co lema “Se un bo planeta queres ter, reciclar é ou que tes que facer”, o traballo da Divina Pastora pretendía transmitir que, dada a elevada xeración diaria de basura, a reciclaxe constitúe un hábito de primeira necesidade para poder gozar dunha contorna limpa e saudable.

O xurado, conformado por membros da Consellería de Cultura, Educación, Formación Profesional e Universidades, e de Sogama, valoraron, entre outras cuestións, a calidade dos carteis presentados, a creatividade e a orixinalidade dos mesmos, a mensaxe ambiental transmitida co obxectivo de lograr un impacto positivo na concienciación social da poboación e a claridade da redacción do texto explicativo para facilitar a súa comprensión.

Sobre "Recíclate con Sogama"

En vigor desde hai unha década, o obxectivo desta iniciativa é instaurar a recollida selectiva de residuos nas aulas e formar ao alumnado no principio dos tres erres (redución, reutilización e reciclaxe).

Con tal fin, Sogama proporciona a cada un dos colexios participantes en cada edición (no curso académico 2022-2023 participaron 20 centros, entre os que se atopou o Divina Pastora), unha illa de reciclaxe conformada por tres contedores (azul, para o papel e cartón; amarelo, para os envases de plástico, latas e briks; e xenérico, para a fracción resto), ademais dun composteiro para aqueles que dispoñan de servizo de comedor ou que xeren unha cantidade importante de orgánicos procedentes das merendas do alumnado, así como de terreo (horta ou xardín) para a aplicación do compost resultante.

Igualmente, a compañía entrega a cada colexio material didáctico de apoio e imparte formación a través de educadores especializados, os cales se encargan tamén de realizar visitas de seguimento para comprobar a evolución dos proxectos de reciclaxe, resolver dúbidas e corrixir erros.

Os centros deben presentar unha memoria de actividades a través da aplicación informática do Plan Proxecta, que será avaliada e cualificada por Sogama e a propia Consellería de Educación.

Saúdos, Departamento de Comunicación