• O presidente da Sociedade participará o próximo luns, 28 de abril, no IV Encontro ESGREM, un grupo de traballo integrado polos entes supramunicipais para a xestión dos residuos municipais

• Intervirá tamén nunha mesa redonda na que estará acompañado por representantes do Consorci per á gestió dels residus do Vallès Oriental, EMTRE e  o Consorci per á gestió de residus do Vallès Occidental

Cerceda, a 25 de abril de 2025.- O presidente de Sogama, Javier Domínguez, participará o próximo luns, 28 de abril, no IV Encontro ESGREM, que se celebrará na sede do Consello Insular de Ibiza, e no que se abordarán distintas temáticas de actualidade para o sector.

Logo dunha primeira sesión protagonizada por Álvaro Feliu, asesor da Fundación Fórum Ambiental, e que virará ao redor da economía circular competitiva e as tendencias na xestión de residuos e recursos, a intervención de Domínguez Lino terá lugar na segunda sesión, introducida e moderada por Ángel Rodríguez, xerente do Consorci de Ribeira i Valldigna, que se centrará na reciclaxe dos biorresiduos procedentes da recollida separada e onde dará a coñecer a experiencia de Sogama na compostaxe da materia orgánica, tanto industrial como doméstico.

Acto seguido, formará parte dunha mesa redonda na que estará acompañado por Vanessa Abada, directora da área de Tratamento do  Consorci per á gestió dels residus do Vallès Oriental; Eduardo Ramón, Técnico de apoio a Xerencia en EMTRE; e Noemí Iglesias, Directora de Infraestruturas e Planificación do Consorci per á gestió de residus do Vallès Occidental.

O financiamento da xestión dos residuos municipais para complementar a taxa xusta constituirá o eixo da terceira sesión, que presentará e moderará Carlos Vázquez, director de Servizos de Limpeza e Xestión de Residuos do Concello de Barcelona, contando coas achegas de Paz Orviz, xerente de Cogersa; César Gimeno, director xeral do Consorcio de Residuos de Gipuzkoa (GHK); Juanjo Gil, xerente do Consorcio de Auga e Residuos da Rioxa; e Ángel Álvarez, xefe de Recollida de Residuos Urbanos da Mancomunidade da Comarca de Pamplona.

Na xornada vespertina abordaranse os convenios cos SCRAPS de residuos comerciais (de envases de cartón), sesión que presentará Jordi Vilaró, así coma o tratamento da fracción resto para cumprir os obxectivos de reciclaxe e limitación de vertedura, sesión que conducirá Carles Salesa, director do Consorci de Residus do Maresme, e na que están previstas as intervencións de Montse Ruiz, Técnica superior de medio ambiente do Consell d’Eivissa; Marta Sánchez de Porta, Xerente do Consorcio Almanzora-Levante-Vélez; e Javier Manzano, Xerente do Consorcio provincial de residuos de Salamanca

Sobre ESGREM

ESGREM (Entes Supramunicipais para a Xestión de Residuos Municipais) é un grupo de traballo coordinado pola Fundación Fórum Ambiental, e constituído en xaneiro de 2021, que hoxe conta con 35 entidades adscritas (consorcios, mancomunidades, comarcas, consells insulars, deputacións e áreas metropolitanas) repartidas por toda a xeografía española e que dan servizo a máis de 21 millóns de persoas.

ESGREM creouse precisamente para potenciar e formalizar a cooperación e coordinación das entidades locais supramunicipais dedicadas á xestión de residuos en España, sendo a súa misión a de acelerar a transición cara á xestión sostible de residuos municipais no noso país e, desta forma, contribuír á protección do clima e ao cumprimento dos obxectivos europeos.

Saúdos, Departamento de Comunicación