- Prohibirase a venda de microplásticos como tales, así como a de produtos aos que se tiveran engadido intencionadamente e que os liberen cando se utilicen
- No Plan de Acción de Contaminación Cero, a Comisión fixou o obxectivo de reducir o impacto por microplásticos nun 30% para 2030
Cerceda, ao 24 de outubro de 2023.- O pasado mes de setembro, a Comisión Europea dou outro paso importante na protección do medio ambiente ao adoptar medidas que restrinxen os microplásticos agregados intencionadamente aos produtos baixo a lexislación química da UE REACH. Así, as novas normas evitarán a liberación ao medio ambiente de ao redor de medio millón de toneladas de microplásticos. Prohibirase a venda como tales, así como a de produtos aos que se tiveran engadido intencionalmente e que os liberen cando se utilicen. No caso de que estean debidamente xustificados, aplicaranse excepcións e períodos de transición para que os afectados se adapten ás novas normas.
A restrición adoptada utiliza unha definición ampla de microplásticos, xa que cobre todas as partículas de polímeros sintéticos de menos de cinco milímetros que son orgánicas, insolubles e resistentes á degradación. Algúns exemplos de produtos comúns dentro do alcance da restrición son os seguintes:
- O material de recheo granular utilizado en superficies deportivas artificiais
- Cosméticos onde os microplásticos se utilizan para múltiples propósitos, como a exfoliación (microperlas) ou a obtención dunha textura, fragancia ou cor específica
- Deterxentes, suavizantes, brillantina, fertilizantes, produtos fitosanitarios, xoguetes, medicamentos e dispositivos médicos
Os produtos utilizados en instalacións industriais, ou que non liberan microplásticos durante o seu uso, quedan excluídos da prohibición de venda, pero os seus fabricantes deberán proporcionar instrucións sobre como utilizar e eliminar o produto para evitar as emisións de microplásticos.
No Plan de Acción de Contaminación Cero, a Comisión fixou o obxectivo de reducir a contaminación por microplásticos nun 30% para 2030.
Fonte: Comisión Europea
Imaxe: Pexels
