• O Consello da UE aprobou, a principios desta semana, a Lei de Materias Primas Críticas, que pretende asegurar o abastecemento destes materiais, esenciais para a transición ecolóxica e dixital.

Cerceda, a 21 de marzo de 2024.- O Consello da UE adoptou o novo Regulamento polo que se pretende establecer un marco que garanta o abastecemento, seguro e sostible, de materias primas críticas, máis coñecido como Lei de Materias Primas Críticas (CRMA).

A CRMA introduce prazos claros para os procedementos de autorización dos proxectos extractivos da UE, permite á Comisión Europea, así como aos Estados membros, recoñecer un proxecto como estratéxico, esixe avaliacións de risco da cadea de subministración, require aos Estados membros plans nacionais de exploración e garante o acceso da UE ás materias primas críticas e estratéxicas mediante ambiciosos criterios de referencia sobre extracción, transformación, reciclado e diversificación das fontes de importación.

Segundo explicou Jo Brouns, Ministro flamenco de Economía, Innovación, Traballo, Economía Social e Agricultura, «Coa Lei de Materias Primas Críticas queremos converter a debilidade das nosas dependencias en autonomía estratéxica e nunha oportunidade para a nosa economía. Este acto lexislativo impulsará o noso sector mineiro, mellorará as nosas capacidades de reciclaxe e transformación, creará postos de traballo locais e de boa calidade, e garantirá que a nosa industria estea preparada para as transicións dixital e ecolóxica».

O texto final aprobado identifica dúas listas de materiais (34 críticos e 17 estratéxicos) cruciais para as transicións ecolóxica e dixital, así como para as industrias de defensa e espacial.

A CRMA establece tres puntos de referencia para o consumo anual de materias primas da UE: 10% de extracción local; 40% que se procese na UE e 25% que proceda de materiais reciclados.

Para facilitar o desenvolvemento de proxectos estratéxicos, os Estados membros crearán portelos únicos no nivel administrativo pertinente e na fase correspondente da cadea de valor das materias primas críticas.

Os proxectos de extracción recibirán os seus permisos nun prazo máximo de 27 meses, mentres que os de reciclaxe e transformación deberán recibilos en 15 meses, con excepcións limitadas destinadas a garantir un compromiso significativo coas comunidades locais afectadas polos proxectos e unha avaliación axeitada do impacto ambiental en casos complexos.

As grandes empresas que fabrican tecnoloxías estratéxicas (por exemplo, produtores de baterías, hidróxeno ou xeradores renovables) levarán a cabo unha avaliación de riscos das súas cadeas de subministración para identificar vulnerabilidades.

Tras ser asinado polo presidente do Parlamento Europeo e o presidente do Consello, o Regulamento publicarase no Diario Oficial da Unión Europea e entrará en vigor aos vinte días da súa publicación.

Fonte: Residuos Profesional

Imaxe: Pexels