• Así se expuxo no IV Congreso Nacional de Xestión de RAEE celebrado os pasados días 22 e 23 de setembro en Zaragoza
• Todos os relatores coincidiron na importancia do modelo colectivo de xestión, tanto polos seus beneficios ambientais como para reducir a dependencia no abastecemento de materias primas
• De feito, máis do 75% dos aparellos recollidos polos sistemas colectivos procede da canle comercial

Cerceda, a 26 de setembro de 2022.- Tal e como se expuxo no IV Congreso Nacional de Xestión de RAEE, celebrado os pasados días 22 e 23 de setembro en Zaragoza, o 95% das empresas que comercializan aparellos eléctricos e electrónicos no mercado español xa confía nos sistemas colectivos para cumprir a súa obrigación de organizar e financiar a reciclaxe destes produtos ao finalizar a súa vida útil.

O encontro, organizado por OfiRaee, entidade que agrupa aos sistemas colectivos que operan no noso país (Ecoasimelec e Ecofimática, ambos os dous xestionados por Recyclia, Ambilamp, Ecolec, Eco-Raee’s, Ecotic, ERP e Ecolum), abordou os últimos avances e tendencias lexislativas e tecnolóxicas en reciclaxe de aparellos electrónicos, poñendo de manifesto a contribución estratéxica dos sistemas colectivos para o desenvolvemento das políticas nacional e comunitaria sobre economía circular. Neste sentido, todos os relatores coincidiron na importancia do modelo colectivo de xestión, tanto polos seus beneficios ambientais como para reducir a dependencia no abastecemento de materias primas.

Ao respecto, Juan Carlos Enrique, presidente de OfiRaee, sinalou que “a crise xerada pola invasión de Ucraína e as tensións con China demostraron que Europa debe impulsar un modelo de independencia enerxética e industrial. Neste contexto, a economía circular revélase aínda máis estratéxica”.

Na mesma liña de desvincular o crecemento económico e a preservación do medio ambiente do abastecemento de recursos, manifestouse Cristina Riestra, responsable de Medio Ambiente e Clima da CEOE. Na súa intervención, fixo fincapé na produción de aparellos electrónicos sostibles desde o seu deseño, xa que “o 80% dos impactos ambientais pódese intuír desde esta fase da produción”.

CANLE COMERCIAL

O congreso abordou a importancia do rol da distribución na recollida de residuos electrónicos por tratarse do actor máis próximo ao consumidor, así como a súa estreita colaboración cos sistemas colectivos. De feito, máis do 75% dos aparellos recollidos por estes últimos procede da canle comercial.

Así mesmo, os representantes da distribución sinalaron, como o seu principal reto neste ámbito, o incremento da carga administrativa que implica a actual normativa de xestión ambiental de residuos electrónicos, para cuxa aplicación solicitan flexibilidade e harmonización.

Fonte: FuturEnviro

Imaxe: Pexels