• A xestión de recursos enerxéticos e de residuos son os dous grandes nichos de emprego verde, aínda que existen diferenzas significativas entre os distintos Estados

Cerceda, a 10 de marzo de 2025.- En 2022, e segundo datos de Eurostat, o emprego verde nos países da Unión Europea, é dicir, aquel que se xera na economía ambiental, aumentou un 9,5% respecto do ano anterior, medido en equivalentes de tempo completo. O incremento oscilou entre o 2,8% en Chequia e o 38% en Grecia, mentres que en Malta, Lituania e Eslovaquia diminuíu no mesmo período.

No caso concreto de España, o emprego verde pasou dos 337.000 postos de traballo de 2014 aos máis de 577.000 de 2023.

En comparación con 2021, o emprego no sector da xestión de recursos enerxéticos aumentou de forma significativa (+73%, +34% e +48%, respectivamente) en Italia, Alemaña e Portugal. No sector da xestión de residuos, diminuíu un 2,5% en Italia, mentres que en Francia e Alemaña aumentou un 1,6% e un 4,6%, manténdose estable en España.

Nos países da UE, a meirande parte do emprego verde está relacionado coa xestión dos recursos enerxéticos (un 34,8 % de media). Con todo, a proporción varía considerablemente entre países. A máis alta rexístrase en Luxemburgo (70,5 %), seguido de Suecia (68,3 %) e Italia (61,5 %). Pola contra, Malta rexistra o 3,7 %, Hungría o 12,7 %, e Chipre o 14,3 %.

A xestión de residuos é o segundo nicho de emprego verde na UE, seguido das actividades de protección ambiental e a xestión de augas residuais.

Fonte: Residuos Profesional

Imaxe: Pixabay