• Así se pronunciou o presidente executivo desta empresa pública, Javier Domínguez, durante a súa intervención no acto de peche do proxecto Ecoval-Sudoe, liderado en España por Cetaqua
• Durante a súa alocución, repasou os fitos máis relevantes durante os 30 anos de actividade de Sogama: desde a súa creación, en 1992, como empresa pública de tratamento de residuos, ata o día de hoxe, momento no que aspira a converterse nunha empresa xeradora de recursos

Cerceda, a 10 de marzo de 2023.- Con motivo da súa participación no evento de peche do proxecto “Ecoval-Sudoe: cara a unha xestión circular de biorresiduos urbanos e lodos de depuradora”, que onte tivo lugar en Ourense, o presidente executivo de Sogama, Javier Domínguez Lino, repasou os fitos máis relevantes dos 30 anos de actividade desta empresa pública: desde a súa creación, no ano 1992, co obxectivo inmediato de resolver unha grave problemática ambiental e de saúde pública derivada da ausencia dunha xestión controlada de residuos, articulando para isto un sistema integral inspirado nos países europeos máis desenvolvidos e comprometidos co medio ambiente, ata o día de hoxe, momento no que Sogama, grazas ás melloras introducidas durante os últimos anos, situouse na cúspide da modernidade e da eficiencia a nivel europeo, sendo tamén todo un referente na esfera mundial.

Pero, nunha contorna global e cambiante na que nos movemos, o máximo responsable desta empresa pública asegurou que “Sogama non pode permanecer allea ao mesmo, xa que, non só debe prestar un servizo básico e esencial para a cidadanía, senón que debe facelo coa máxima calidade, a maior eficiencia e o menor impacto ambiental e económico”.

Domínguez Lino asegurou que esta compañía pública adéntrase nun cambio de era, pois, máis aló de dispensar un correcto tratamento aos residuos, quere ser unha empresa xeradora de recursos e actor crave na transición de Galicia cara a unha verdadeira economía circular que priorice o consumo responsable, a menor xeración de refugallos, o mantemento dos produtos o maior tempo posible na economía e a conversión destes en recursos, unha vez esgotada a súa vida útil.

É por isto que a entidade xa se atopa traballando no seu novo plan estratéxico 2024-2030, no que cobrará especial protagonismo a innovación tecnolóxica e a dixitalización nas operacións e procesos industriais, a firme aposta pola intelixencia artificial e a descarbonización dos seus procesos, en liña coas directrices do Pacto Verde Europeo.

SOBRE ECOVAL-SUDOE

Trátase dun proxecto cofinanciado polo Programa Interreg Sudoe, a través do Fondo Europeo de Desenvolvemento Rexional (FEDER), que propón un novo enfoque para a xestión de residuos orgánicos mediante un modelo de biofactoría, replicable en toda a Unión Europea, para obter bio-produtos de alto valor engadido a partir de lodos de depuradora e biorresiduos urbanos.

Ecoval aglutina a participación de 8 entidades (4 de España, con Cetaqua á cabeza), 2 de Francia e 2 de Portugal.

Saúdos, Departamento de Comunicación