- Estes galardóns renden homenaxe a persoas de entre 18 e 30 anos que teñan demostrado un potencial excepcional para axudar a protexer o medio ambiente
- En concreto, o PNUMA busca a sete mozos que poñan en práctica ideas e solucións pioneiras para facer fronte á tripla crise planetaria do cambio climático, a perda de biodiversidade e a contaminación
- O prazo para a presentación de candidaturas estará aberto ata o próximo 5 de abril
Cerceda, a 11 de marzo de 2024.- O Programa das Nacións Unidas para o Medio Ambiente (PNUMA) lanzou unha nova convocatoria de candidaturas para o seu premio Mozos/as Campións da Terra, que recoñece as contribucións da xente nova e o seu destacado potencial para liderar os esforzos orientados a protexer o medio ambiente.
Este ano, o PNUMA seleccionará a sete mozos (de entre 18 e 30 anos) que constitúan un exemplo de compromiso ambiental e lideren proxectos que protexan e revitalicen a natureza para loitar contra o cambio climático, restaurar os servizos dos ecosistemas e facer fronte á contaminación, logrando un futuro máis verde.
A edición deste ano celébrase co respaldo do Decenio das Nacións Unidas sobre a Restauración dos Ecosistemas e o apoio do novo Marco Mundial de Biodiversidade.
Os Mozos/as Campións do PNUMA seleccionados recibirán 20.000 dólares de financiamento inicial, a oportunidade de asistir a reunións de alto nivel das Nacións Unidas, acceso a unha comunidade de expertos mundiais e formación intensiva, así como asesoramento personalizado para dar vida ás súas grandes ideas ambientais.
Este certame conta co apoio de Elephant17.org, unha iniciativa centrada en "Retribuír a favor do clima", fundada por Chris Kemper, que desempeña tamén o cargo de Defensor das Alianzas do PNUMA e é presidente, fundador e director executivo de Palmetto Clean Technology, entidade que ten por obxecto capacitar aos mozos que promoven a xestión responsable do medio ambiente en todo o mundo.
As candidaturas están abertas ata o próximo 5 de abril.
Fonte e imaxe: PNUMA
