• Estes premios recoñecen produtos e innovacións destacadas no uso circular dos plásticos en Europa.

Cerceda, a 24 de febreiro de 2022.- O prazo para a presentación de candidaturas aos Plastics  Recycling  Awards  Europe 2022, a través dos cales se recoñecen produtos e innovacións destacadas no uso circular dos plásticos, pechará o próximo 7 de marzo.

Estes premios están abertos á participación en sete categorías: produto de automoción, eléctrico ou electrónico; produtos para a construción; produtos para o fogar e o lecer; produto de embalaxe de plástico; produto de innovación tecnolóxica; innovación en maquinaria de reciclaxe, e embaixador da reciclaxe de plásticos.

Poderán optar aos mesmos os propietarios de marcas, fabricantes de produtos de plástico, comerciantes polo miúdo, deseñadores de produtos, produtores de envases, materias primas e máquinas de reciclaxe de plásticos, así coma os provedores de produtos de plástico reciclado de toda a cadea de valor.

Os finalistas preseleccionados anunciaranse nunha cerimonia en liña que se celebrará en abril, e os gañadores recibirán os seus galardóns o segundo día da feira Plastics  Recycling Show  Europe ( PRSE), que terá lugar no RAI de Ámsterdam do 22 ao 23 do próximo mes de xuño. Todos os finalistas expoñeranse nunha área de exhibición en  PRSE.

REQUISITOS

Para poder optar a un premio, as candidaturas deben cumprir unha serie de requisitos:

• Deben ser deseñadas, desenvolvidas ou fabricadas en Europa, e deben ser produtos acabados.
• Os produtos deben estar fabricados con plásticos reciclados  posconsumo/ poscomercial/ posindustrial.
• Deben ter alomenos un 50% de contido reciclado.
• Deben estar fabricados con plásticos convencionais (sen incluír o contido biodegradable ou  oxodegradable).
• Deben ser reciclables.

Os Plastics  Recycling  Awards  Europe están organizados conxuntamente por  Plastics  Recyclers  Europe e  Crain  Communications.

Fonte e imaxe:  Plastics  Recycling  Awards  Europe