• Coa súa humilde achega, Javier Domínguez quere contribuír a dar cobertura ás necesidades hemoterápicas dos centros sanitarios galegos
• Tal e como anunciou recentemente a Consellería de Sanidade, todos os días do ano precísanse en Galicia entre 400 e 500 doazóns de sangue

Cerceda, a 11 de febreiro de 2025.- O presidente de Sogama, Javier Domínguez, doou esta mañá sangre na unidade móbil da Axencia Galega de Doazón de Órganos e Sangue (ADOS) para contribuír a dar cobertura ás necesidades hemoterápicas dos centros sanitarios galegos e, desta forma, manter unha subministración axeitada e absolutamente imprescindible para salvar vidas.

Con este humilde xesto, Domínguez quere inspirar a outras persoas a unirse a esta importante causa, xa que cada ano, milleiros de doentes necesitan transfusións de sangue por diversas razóns, sexan cirurxías, tratamentos médicos ou emerxencias.

Tal e como indicou en días pasados a Consellería de Sanidade, os meses de xaneiro e febreiro adoitan coincidir cun aumento de enfermidades como a gripe, que impiden a doazón de maneira temporal ata a recuperación dos afectados, sendo datas nas que se pode reducir a base de potenciais doantes. Con todo, a necesidade de compoñentes sanguíneos por parte dos hospitais galegos non diminúe, e todos os días do ano requírense entre 400 e 500 doazóns de sangue.

Para máis información ou para coñecer a data dos desprazamentos das unidades móbiles, ADOS dispón do sitio web: ados.sergas.gal, as redes sociais, e o teléfono gratuíto: 900 100 828.

Saúdos, Departamento de Comunicación