• Así se recolle no III Informe Anual de Recyclia sobre Tendencias na industria da reciclaxe de RAEE e pilas en España
• Segundo este mesmo informe, o sector xerou 21.300 postos de traballo a tempo completo en 2021 (+12,1%, respecto a 2019) e incrementou un 16,4% a súa contribución ás arcas públicas do Estado, pasando de 176 M€ en 2019 a 205 M€ en 2021
• O documento tamén desvela que un incremento dun punto porcentual da poboación con educación superior impacta nun crecemento de 0,63 puntos da taxa de reciclaxe

Cerceda, a 11 de novembro de 2022.- Segundo o III Informe Anual de Recyclia sobre Tendencias na industria da reciclaxe de RAEE e pilas en España, o sector da reciclaxe de residuos de aparellos eléctricos e electrónicos (RAEE), pilas e baterías xerou en España un Valor Engadido Bruto (VAB)1 de 1.230 M€ en 2021, cifra que representa un crecemento de case o 21% respecto a 2019, cando se contabilizaron 1.100 M€, e retoma a súa senda alcista tras o impacto da pandemia en 2020.

Segundo este mesmo informe, o sector xerou 21.300 postos de traballo a tempo completo en 2021 (+12,1%, respecto a 2019) e incrementou un 16,4% a súa contribución ás arcas públicas do Estado, pasando de 176 M€ en 2019 a 205 M€ en 2021.

No que se refire ás cifras, tanto de aparellos electrónicos e pilas postos no mercado como de xestión dos seus residuos, o estudo analiza os últimos datos dispoñibles correspondentes aos anos 2021 e 2019, respectivamente.

En relación aos primeiros, reflicte os cambios sociais e produtivos derivados da pandemia e a transformación dixital. Así, a cantidade de unidades de aparellos postos no mercado (816,9 millóns) rexistrou un máximo histórico (+9,3%) en 2021. Este crecemento foi empuxado polo segmento doméstico con 656,6 millóns de unidades, (+12% respecto a 2020). Pola súa banda, o segmento profesional decreceu un 0,6% en unidades e un 6,1% en volume.

En canto á recollida, o último dato dispoñible é de 2019, con 371.000 toneladas de aparellos electrónicos. Esta cifra supón un incremento interanual do 11,6% e representa o 55% das toneladas postas no mercado, en promedio, no trienio anterior, superando amplamente o obxectivo establecido pola Unión Europea do 45%. Cabe destacar que España sitúase por riba da media da UE (48,5%) e avantaxa a economías como a alemá, a francesa ou a italiana.

Polo que se refire a pilas, baterías e acumuladores, en 2021 alcanzaron os 702 millóns de unidades (16.659 toneladas) postos no mercado, o que representa incrementos do 15,6% en unidades e do 11,3% en peso.

Polo que se refire á xestión destes residuos, en 2019 xestionáronse 240.700 toneladas, segundo máximo no período 2010-2019.

A TAXA DE RECICLAXE ASÓCIASE AO NIVEL EDUCATIVO DA POBOACIÓN

Esta terceira edición do informe de Recyclia profunda, por primeira vez, en certos aspectos sociolóxicos da reciclaxe, sendo moi determinante o nivel educativo. De feito, apunta que un incremento dun punto porcentual da poboación con educación superior impacta nun crecemento de 0,63 puntos da taxa de reciclaxe.

Para este cálculo, o informe tomou como referencia un estudo desenvolvido en 26 países europeos, atendendo á súa poboación, nivel de estudo e toneladas de residuos recicladas. Así mesmo, establece que o gasto por fogar en aparellos electrónicos aumenta 0,68% por cada 1% de incremento da súa renda.

MÁIS TONELADAS DE BATERÍAS DE MOBILIDADE ELÉCTRICA

De acordo co estudo de Recyclia, o auxe da micromobilidade de vehículos eléctricos, o sector fotovoltaico e as oportunidades que brindan os fondos Next Generation, son vectores claros que empuxarán o crecemento do sector. De feito, en 2020, a fundación Ecopilas, administrada por Recyclia, xestionou un 67% máis de toneladas de baterías de mobilidade eléctrica que en 2019, das cales o 54% xa proviñan de vehículos da categoría de micromobilidade.

O crecemento do fluxo destes residuos impón ao sector o desafío de innovar en tecnoloxía para optimizar o seu tratamento.

MERCADO FOTOVOLTAICO

Respecto do mercado fotovoltaico, agárdase que a potencia instalada en España supere os 20 GW este ano. De continuar os crecementos deste tipo de instalacións, tanto de plantas de solo como de autoconsumo, poderanse alcanzar os 39,7 GW antes de 2030, obxectivo marcado polo Plan Nacional Integrado de Enerxía e Clima. Todo isto desbordou as previsións e implicará cambios na xeración dos fluxos destes residuos, favorecendo o despregamento de capacidades para reciclar estes aparellos.

Se ben o fluxo deste tipo de residuos é aínda reducido debido á súa prolongada vida operativa, a fundación Ecoasimelec, integrada en Recyclia, prevé que en 2022 xestionará máis toneladas de paneis fotovoltaicos que no período 2018- setembro 2022 (2.200 toneladas).

Fonte e imaxe: Alimarket Electro