- Coordinado pola Confederación Española de Pesca (Cepesca), desenvólvese en colaboración coa Federación Nacional de Confrarías de Pescadores (FNCP) e o Centro Tecnolóxico de Automoción de Galicia (CTAG)
- O seu obxectivo é triplo: previr a contaminación e o seu impacto na biodiversidade; promover a economía circular na xestión das artes de pesca descartadas; e dar cumprimento ao marco europeo sobre os plásticos dun só uso
Cerceda, a 20 de setembro de 2024.- O sector pesqueiro español recuperará alomenos 100 toneladas de redes e aparellos descartados dentro do proxecto ‘Redes de España’, que coordina a Confederación Española de Pesca (Cepesca) e desenvólvese en colaboración coa Federación Nacional de Confrarías de Pescadores (FNCP) e o Centro Tecnolóxico de Automoción de Galicia (CTAG).
O proxecto, que se leva a cabo no marco do programa Pleamar da Fundación Biodiversidad, terá unha duración de 18 meses e está dotado con financiamento de ao redor de 1 millón de euros do Fondo Europeo Marítimo, de Pesca e Acuicultura (FEMPA)
O seu obxectivo é triplo: previr a contaminación e o seu impacto na biodiversidade; promover a economía circular na xestión das artes de pesca descartadas; e dar cumprimento ao marco europeo sobre os plásticos dun só uso.
Con tal fin, o proxecto contempla o deseño, a creación e implantación dunha certificación nacional de xestión e reciclaxe de aparellos e redes de pesca que acabaron a súa vida útil para posibilitar o seu retorno ao ciclo produtivo a través de procesos innovadores. Esta certificación e o seu regulamento de uso garantirán o establecemento dun sistema de recollida, transporte e valorización dos aparellos de pesca descartados que garanta ás entidades produtoras dos residuos a súa rastrexabilidade e reintrodución ao mercado, avanzando cara ao obxectivo do residuo cero.
Desta forma, o sector pesqueiro dará cumprimento á Directiva Europea 2019/904, do 5 de xuño, sobre a redución do impacto de certos produtos de plástico no medio ambiente, coñecida como Directiva SUP (Single Use Plastics Directive) ou Directiva de plásticos dun só uso. Esta directiva obrigará aos estados a impulsar un sistema de responsabilidade ampliada do produtor (RAP), de forma que os produtores de redes e artes de pesca que conteñen plástico dean cumprimento á mesma.
O sector pesqueiro agrupado en Cepesca e a FNCP contan co CTAG como socio no proxecto ‘Redes de España’ para introducir técnicas innovadoras que contribúan a garantir a circularidade, incluíndo o deseño de novos materiais elaborados a partir de compoñentes derivados das redes e aparellos de pesca descartados como primeiro paso para lograr a plena reintrodución destes en sectores tales como a automoción, o naval ou a aeronáutica.
Fonte e imaxe: Cepesca
