• Do 8 ao 23 de marzo, 6.256 persoas voluntarias acudiron a esta cita para caracterizar e retirar “basuraleza” de contornas fluviais
• As recollidas dos residuos abandonados tiveron lugar en 392 puntos de todo o país e, entre os máis atopados, figuraban pezas de plástico de 0-2,5 cm, cabichas e latas de bebida

Cerceda, a 26 de marzo de 2025 – No marco do Día Internacional dos Ríos (14 de marzo), o Proxecto LIBERA celebrou unha nova edición da súa campaña ‘1m2 polos ríos, lagos e encoros’, a través da cal mobilizou a 6.256 persoas en toda España para identificar e retirar residuos das contornas acuáticas.

Grazas á implicación da cidadanía, puidéronse analizar 33.619 residuos en 392 puntos distribuídos por todo o país. O obxectivo é precisamente obter datos sobre a cantidade e tipoloxía do lixo presente, xerando coñecemento para promover solucións efectivas fronte a este problema ambiental. Entre o lixo máis atopado e caracterizado nas contornas fluviais destacan as pezas de plástico de 0-2,5 cm, cabichas e latas de bebida.

A convocatoria contou, como en anos anteriores, cunha ampla participación de diversos colectivos: Administracións locais, centros educativos, empresas e asociacións organizaron 124, 33, 26 e 137 puntos de mostraxe, respectivamente.

Na tarefa de caracterización de residuos, todos estes colectivos fixeron uso da app ‘eLitter’, creada por Paisaje Limpio e Vertidos Cero, en colaboración con LIBERA, a cal facilita este labor necesario para poder estudar os materiais e a súa tipoloxía. Toda a información obtida intégrase directamente na base de datos do MITECO e queda reflectida no “Barómetro da Basuraleza” do Proxecto LIBERA.

Fonte e imaxe: Libera