- Organizado por Grupo Landbell, matriz de ERP, premia con 25.000 euros servizos e produtos innovadores no ámbito dos residuos.
- España sitúase na cuarta posición no podio de países con maior número de proxectos presentados a concurso.
- A metade dos proxectos presentados desde o noso país propoñen ideas de negocio baseadas na reciclaxe, mentres que un 37,5% mostran solucións dixitais para economía circular e o 12,5% restante xiran ao redor da prevención da xeración de residuos
Cerceda, a 23 de decembro de 2021.- Un total de oito proxectos españois centrados na economía circular competirán este ano na oitava edición do galardón europeo Green Alley Award, organizado polo Grupo Landbell e as súas filiais, entre as que se atopa European Recycling Platform (ERP).
O premio ten unha dotación económica de 25.000 euros para o gañador, seleccionado entre as star- up europeas de servizos e produtos innovadores que participan.
Este ano presentáronse a concurso un total de 177 proxectos procedentes de 25 países europeos. España, con 8, sitúase na cuarta posición no podio de países con maior número de proxectos en concurso, unicamente por detrás de Alemaña (62), Italia (24) e Reino Unido (21).
A metade dos proxectos presentados desde o noso país propoñen ideas de negocio baseadas na reciclaxe, mentres que un 37,5% mostran solucións dixitais para economía circular e o 12,5% restante céntranse na prevención da xeración de residuos.
Estas porcentaxes difiren da media europea, onde as solucións de reciclaxe só aglutinan o 34% dos proxectos presentados, aínda que se converte nunha área de negocio á alza en Europa, xa que na pasada edición só representaban un 22%. As solucións para a prevención de residuos mantéñense, cun 41% de proxectos, en cifras similares ás do pasado ano. Finalmente, no conxunto dos 25 países participantes, as solucións dixitais para a mellora da economía circular perden presenza, cun 25%, fronte ao 41% da anterior edición.
Os fluxos de residuos nos que se centran os proxectos españois abarcan solucións para os residuos eléctricos e electrónicos (RAEE), envases, téxtil, materias primas críticas ou residuos municipais, entre outros.
Os servizos aglutinan o 50% dos proxectos españois presentados, mentres que un 37,5% compiten con produtos e o 12,5% restante céntrase no desenvolvemento tecnolóxico. A escala internacional, a maioría das compañías decantáronse por presentar produtos (49,7%), mentres que os servizos supoñen un 29,3% e os desenvolvementos tecnolóxicos, un 21%.
Fonte e imaxe: Retema
