• Co aumento de desprazamentos a partir do 1 de agosto, o Proxecto LIBERA lembra, coa súa campaña ‘Tirar basuraleza na estrada nunca leva a un bo lugar’, a importancia de non abandonar lixo nas cunetas

Cerceda, a 31 de xullo de 2024.-Arrinca a ‘Operación Especial 1º de agosto’ e isto significa que millóns de cidadáns vanse mover polas estradas españolas estas semanas. Segundo a DXT (Dirección Xeral de Tráfico) prevese que haxa durante os meses de xullo e agosto 94 millóns de desprazamentos longos en coche polas estradas españolas. Debido a isto, o Proxecto LIBERA, de SEO/BirdLife en alianza con Ecoembes, fai un chamamento á cidadanía para que non abandone lixo nas cunetas, xa que esta acción trae graves consecuencias e contamina os espazos naturais.

Para isto, conta coa súa campaña ‘Tirar basuraleza na estrada nunca leva a un bo lugar’, desenvolvida xunto á DXT, a cal vai acompañada dun informe que reflicte todos os riscos que conleva  tirar lixo nas estradas.

Os refugallos nas cunetas como as cabichas, restos de cristais ou comida poden provocar incendios, incrementar o risco de inundacións debido ao atasco das vías de encauzamento de augas e representar un perigo para os usuarios da estrada, especialmente para os máis vulnerables, como motociclistas e ciclistas. Con todo, o seu impacto máis grave é a contaminación causada pola vertedura de substancias tóxicas. Restos como frigoríficos, termómetros, latas de pintura, baterías de coche, aceites ou combustibles son abandonados en beiravías, os cales provocan contaminación química. Os refrixerantes como o freón e metais tóxicos como o chumbo ou o cadmio son elementos que pasan dos residuos á contorna a través da choiva, nun proceso coñecido como percolación, chegando a afectar a reservas de augas.

O informe identifica como fonte principal destes residuos os propios usuarios das vías de transporte: os condutores nun 53% e peóns nun 23%. O lixo nas cunetas é un problema que afecta a todos en múltiples aspectos: contamina o medio ambiente, fai perigar á biodiversidade da contorna e pon en perigo directo a vida dos condutores.

Puntos negros

Neste sentido, é de gran importancia concienciar, previr e contar coa colaboración de toda a poboación. Por iso, LIBERA, destaca a dispoñibilidade dun formulario no cal cada individuo pode sinalar a existencia dun ´punto negro de basuraleza´, que é unha acumulación de residuos abandonados na natureza e que non pode ser recollida por voluntarios debido ás súas características de peso ou volume. Ante isto, infórmase as autoridades ou administración pública para que se encarguen da súa correspondente eliminación.

Fonte e imaxe: IndustriAmbiente