• Así o asegurou José María Baldasano, catedrático de Enxeñaría Ambiental da Universidade Politécnica de Cataluña, durante a súa intervención na primeira edición do Foro Balear de Economía Circular e Xestión de Residuos, celebrado en Palma

Cerceda, a 9 de decembro de 2024.- José María Baldasano, catedrático de Enxeñaría Ambiental da Universidade Politécnica de Cataluña, Premio Nobel da Paz como representante do Grupo Intergobernamental de Expertos sobre o Cambio Climático e académico de número da Real Academia Europea de Doutores-Barcelona 1914 (RAED), asegurou, durante a súa intervención na primeira edición do Foro Balear de Economía Circular e Xestión de Residuos, celebrado en Palma,  que, en 2023, a xestión de residuos foi a responsable do 5,4% das emisións de gases de efecto invernadoiro (GEI) en España, orixinando os vertedoiros o 74% das mesmas; unha porcentaxe moi afastada do tratamento de augas residuais, cun 17%, a incineración, cun 5%,  e o tratamento biolóxico, cun 4%.

O académico participou na mesa de debate que levou por título «Cuestións legais, técnicas e ambientais na xestión de residuos, retos e oportunidades», e que compartiu con Pedro Poveda, socio e coordinador de Medio Ambiente da consultora especializada Gómez-Acevo & Pombo; Julio Berbel, catedrático da Universidade de Córdoba; Jaime Orfila, médico especializado e perito médico; e Neus Andreu, xefa do departamento de Residuos e Economía Circular do Goberno das Illas Baleares.

A través do seu relatorio “Emisión de gases de efecto invernadoiro e contaminantes atmosféricos nos sistemas de tratamento de residuos municipais”, Baldasano deu a coñecer detalles sobre o tipo e nivel de emisións contaminantes, destacando a importancia de captar o biogás xerado na xestión de residuos urbanos e aproveitalo como enerxía.

Os participantes nesta cita destacaron a importancia de fortalecer a cooperación interadministrativa para cumprir cos obxectivos europeos e de incentivar a innovación tecnolóxica para mellorar a eficiencia na xestión de residuos.

Igualmente, incidiron na necesidade de traballar con maior intensidade na prevención da xeración de residuos e a inclusión de solucións como a valorización enerxética da parte non reciclable ou a biometanización da fracción orgánica, así como en reforzar a segregación e reciclaxe para facilitar a xestión eficiente e sostible do lixo.

Neste sentido, puxeron de manifesto a conveniencia de contar con ferramentas e informes de alerta temperá, tal como establece a lexislación europea, para adiantarse na detección de áreas de mellora e reforzar políticas, traballando de forma eficaz na consecución dos obxectivos establecidos pola Unión Europea na xestión deste tipo de residuos.

Autor de numerosos estudos e informes

Baldasano foi o autor do «Informe sobre cambio climático» que debateu a Comisión de Emerxencia Climática do Parlamento de Cataluña e elaborou tamén o «Informe dos Premios Rey Jaime I de Medio Ambiente sobre o Actual Cambio Climático», que asinou xunto a José Luis Rubio Delgado, presidente da Comisión de Medio Ambiente destes premios e que presentou ante o pleno do Alto Consello Consultivo en I+D+i da Presidencia da Generalitat Valenciana.

Tamén presentou o estudo «As zonas de baixas emisións para mellorar a calidade do aire das cidades» no encontro virtual «Barcelona, zona de baixas emisións», celebrado polo diario «La Vanguardia».

Así mesmo, analizou a fondo os efectos da redución de emisións que se produciu debido ás restricións de mobilidade como consecuencia da pandemia en artigos como «Covid-19 lockdown effects on air quality by NON2 in the cities of Barcelona and Madrid (Spain)», onde apelaba á implementación de novas políticas de mobilidade urbana tras certificar unha redución de emisións que se situou entre o 50% e o 62% nestas dúas cidades durante o mes de marzo de 2020.

Fonte: Real Academia Europea de Doutores