- Máis de 6.500 voluntarios participaron nesta iniciativa do Proxecto Libera, que tivo lugar entre os días 3 e 11 de decembro
- Os residuos máis frecuentes recollidos nestas contornas naturais foron cabichas, pezas de plástico de menos de 2,5 cm, así como bolsas, paus e envoltorios de lambetadas
Cerceda, a 16 de decembro de 2022- O Proxecto LIBERA, creado por SÉ/BirdLife en alianza con Ecoembes, celebrou, entre os días 3 e 11 de decembro, a sexta edición da campaña de ciencia cidadá ‘1m2 polo campo, os bosques e o monte’.
Esta iniciativa coincidiu coa conmemoración do Día Internacional das Montañas (11 de decembro) e reuniu a máis de 6.500 persoas voluntarias en 398 puntos de ecosistemas terrestres, 52 máis que na campaña anterior.
Grazas á colaboración cidadá conseguíronse retirar e caracterizar 2,3 toneladas de basuraleza dos campos, bosques e montes do país. Ademais, puidéronse categorizar 25.045 destes residuos, analizando o seu volume, cantidade e tipoloxía.
Entre os residuos máis atopados nos espazos terrestres destacan as cabichas, as pezas de plástico de menos de 2,5 cm, así como as bolsas, paus e envoltorios de lambetadas.
Como en cada edición, as organizacións colaboradoras empregaron ‘eLitter’, unha aplicación móbil pioneira na caracterización de basuraleza desenvolvida polas asociacións Paisaxe Limpo e Vertidos Cero, en colaboración co Proxecto LIBERA. Desta maneira, todos os datos recollidos neste período incorporáronse na base de datos do MITECO e engadiranse aos elementos xa caracterizados que LIBERA inclúe no seu “Barómetro da Basuraleza”
Con esta convocatoria, LIBERA pecha a súa última campaña de ciencia cidadá de 2022. Anteriormente, o proxecto organizou ‘1m2 polas praias e os mares’, que tivo lugar en setembro, e ‘1m2 polos ríos, encoros e pantanos’, desenvolvido durante o pasado mes de marzo. Ambas as dúas mobilizacións foron un éxito grazas ao compromiso de máis de 11.000 persoas voluntarias, que conseguiron caracterizar máis de 117.000 residuos e retirar 13,1 toneladas de basuraleza de 649 puntos repartidos polas diferentes contornas naturais de España, que agora se suman ás desta campaña.
Fonte e imaxe: Proxecto Libera
