• Incide na importancia dunha mellor e máis clara comprensión das habilidades necesarias co fin de deseñar programas de formación que garantan unha oferta e unha demanda de man de obra equilibradas
• O informe mostra que, de media, unha empresa social crea 70 postos de traballo por cada 1.000 toneladas de bens e materiais que recolle con vistas á súa reutilización

Cerceda, a 27 de abril de 2023.- “Poñer ás persoas e as habilidades no centro da economía circular: 18 historias de empresas sociais”. Así reza o título do estudo promovido por RREUSE, a rede internacional de empresas sociais activas na economía circular, no que recompila 18 historias a través das cales  pon de relevo o papel fundamental que desempeñan as empresas sociais na mellora e actualización das habilidades dos traballadores para unha economía máis circular, ao tempo que salienta a importancia dunha mellor e máis clara comprensión destas co fin de deseñar programas de formación que garantan unha oferta e unha demanda de man de obra equilibradas.

Se ben a circularidade pode axudar a estender a vida útil dos produtos e materiais existentes, así como a reducir as emisións de CO2, o certo é que hai moi pouca investigación sobre como mellorar rapidamente as habilidades dos traballadores, circunstancia que podería retardar potencialmente a transición cara a unha economía circular.

As empresas sociais dedicáronse á reutilización de bens durante décadas, creando oportunidades laborais e brindando capacitación aos membros máis vulnerables. O informe mostra que, de media, unha empresa social crea 70 postos de traballo por cada 1.000 toneladas de bens e materiais que recolle con vistas á súa reutilización.

Os casos presentados no estudo mostran a contribución das empresas sociais ao desenvolvemento de habilidades circulares, principalmente entre persoas desfavorecidas e pouco cualificadas. O obxectivo é arroxar luz sobre o importante papel que deben desempeñar estas empresas nunha transición circular inclusiva e xusta.

Fonte e imaxe: RREUSE