• Promovido por ADEN e APROEMA, terá lugar o próximo 5 de febreiro, de 09:30 a 15:30 horas, na Cidade da Cultura

• O obxectivo deste evento é dar a coñecer a xestión de RAEE (Residuos de Aparellos Eléctricos e Electrónicos) na comunidade galega, así como o traballo desenvolvido por empresas do sector e administracións públicas para dar debido cumprimento á normativa vixente

Cerceda, a 27 de xaneiro de 2025.- Santiago de Compostela acollerá, o próximo 5 de febreiro, o I Foro Galicia RAEE.  Promovido pola Asociación Nacional de Empresas Distribuidoras de Electrodomésticos (ADEN), así como pola Asociación Profesional de Empresas Medioambientais de Galicia (APROEMA), e baixo o patrocinio da Fundación ECOLEC e PREZERO España,  terá lugar na Cidade da Cultura, de 09:30 a 15:30 horas, sendo o seu obxectivo dar a coñecer a xestión de RAEE (Residuos de Aparellos Eléctricos e Electrónicos) na comunidade galega, así como o traballo desenvolvido por empresas e administracións públicas para dar debido cumprimento á normativa vixente, poñendo de relevo a importancia crucial da colaboración cidadá.

A xornada, estruturada en presentacións e dúas mesas redondas, pretende ser tamén un punto de encontro para que profesionais, empresas do sector e institucións públicas, tanto autonómicas como estatais, estreiten lazos e traballen conxuntamente para  acadar os obxectivos enmarcados na Axenda 2030 para unha economía circular.

O encontro concluirá cunha intervención da divulgadora científica, investigadora e escritora Deborah García Belloque. Baixo o título “Xeración da conciencia ambiental nos mozos”, porá o foco nas emocións e como estas poden axudar a transmitir unha mensaxe de cambio no compromiso da sociedade co medio ambiente.

Aberto para todos os públicos de forma  gratuíta, a inscrición no Foro poderá realizarse a través de correo electrónico forogaliciaraee@asociacionaden.com, ou ben a través dos sitios web www.asociacionaden.com e www.aproema.com

Fonte e imaxe: APROEMA