• O 94% dos farmacéuticos afirma que informa e anima ao cidadán a depositar correctamente os envases baleiros e os restos de medicamentos nos Puntos SIGRE

Cerceda, a 24 de setembro de 2024.- Mañá celébrase o Día Mundial do Farmacéutico e, nesta ocasión, o lema elixido foi “Farmacéuticos: respondendo as necesidades sanitarias globais; facilitando solucións locais”, pretendendo con isto poñer en valor como a profesión farmacéutica pode axudar a mellorar a saúde da poboación e fortalecer os sistemas sanitarios.

Con motivo deste Día, SIGRE quere destacar a valiosa contribución dos farmacéuticos ao coidado do medio ambiente, reflectida nos distintos ámbitos nos que desenvolven a súa actividade. O seu compromiso é esencial para facer fronte á tripla crise planetaria (perda de biodiversidade, cambio climático e contaminación), mitigando o seu impacto na saúde pública.

A súa implicación é, ademais, fundamental no funcionamento de SIGRE, xa que a industria farmacéutica realiza un importante esforzo económico, técnico e de innovación para lograr envases cada vez máis sostibles. Así, e só durante o trienio 2021-2023, as compañías farmacéuticas adoptaron 749 medidas de ecodeseño que permitiron, entre outros logros ambientais, aforrar 2.800 toneladas de materias primas.

O farmacéutico comunitario é o profesional da saúde máis próximo ao cidadán, e, segundo a última sondaxe realizada para SIGRE, o 94% dos farmacéuticos afirma que informa e anima ao cidadán a depositar correctamente os envases baleiros e os restos de medicamentos nos Puntos SIGRE.

Grazas á loxística inversa que proporciona a distribución, garántese o control farmacéutico e a rastrexabilidade destes residuos, conseguindo aforrar, á súa vez, a emisión de 1.400 toneladas anuais de CO2 á atmosfera, un dos principais gases causantes do cambio climático e do efecto invernadoiro.

Fonte e imaxe: SIGRE