• Trátase do noveno plan que acomete a industria farmacéutica para seguir progresando na aplicación dos principios da economía circular
• O plan fixa como meta reducir o peso dos envases entre un 1 e un 1,5 % e un incremento do 5 % no número de iniciativas de ecodeseño

Cerceda, a 15 de xaneiro de 2024.- No seu permanente compromiso coa economía circular, SIGRE conta cunha estratexia de prevención e ecodeseño para axudar ás compañías farmacéuticas a reducir o impacto ambiental dos envases dos medicamentos. Dentro da mesma cabe destacar o lanzamento do novo Plan Empresarial de Prevención e Ecodeseño (PEPE) de envases do sector farmacéutico para o período 2024-2028. Trátase do noveno plan que acomete a industria farmacéutica para reducir o tamaño e espesor dos envases farmacéuticos, mellorar a súa reciclabilidade e minimizar o seu impacto ambiental. Neste sentido, lémbrase que o 80 % do impacto ambiental dos mesmos determínase na fase de deseño.

O PEPE, que permitirá contribuír ao cumprimento dos obxectivos de prevención establecidos na normativa sobre envases, ten como meta reducir entre o 1 e o 1,5 % o peso dos envases de medicamentos e prevé incrementar nun 5 % o número de iniciativas cualitativas que favorezan a reciclabilidade dos envases e minimicen o seu impacto ambiental.

Resultados dos Plans Empresariais de Prevención de SIGRE

Desde a posta en marcha de SIGRE desenvolvéronse con éxito oito plans trienais de prevención, que permitiron que os envases farmacéuticos sexan cada vez máis ecolóxicos e reciclables. Para isto, desde o ano 2000 ata a actualidade, as compañías farmacéuticas emprenderon máis de 3.300 iniciativas de mellora ambiental, que se aplicaron a máis de 1.000 millóns de envases comercializados ao longo deste período de tempo, de forma que, actualmente, un de cada tres medicamentos comercializados en España incorpora algunha medida de ecodeseño nos seus envases para ser máis respectuoso coa contorna.

Fonte: SIGRE

Imaxe: Pixabay