- Con esta subministración, xa son 100 os recipientes achegados ao concello, propiciando que o proceso de compostaxe nos fogares se leve a cabo de forma máis cómoda, eficiente e hixiénica
- Técnicos da empresa pública impartirán na localidade un curso de formación presencial en datas a acordar polas partes
Cerceda, ao 31 de marzo de 2025.- Sogama entrega ao Concello de Paderne (A Coruña) unha nova partida de 25 composteiros, que serán distribuídos en igual número de vivendas a fin de que a compostaxe doméstica vaia gañando terreo no municipio, dados os seus importantes beneficios ambientais, económicos e sociais.
Con esta subministración serán 100 as familias da localidade que xa participan activamente no programa de autoxestión da materia orgánica e que, polo tanto, pechan o ciclo da súa valorización nos propios fogares, empregando o compost obtido nas súas hortas e xardíns para achegar nutrientes a plantas e cultivos.
Os composteiros configúranse como elementos de apoio no proceso, facéndoo máis cómodo, hixiénico e eficiente.
Aínda que os novos participantes, do mesmo xeito que os anteriores, recibirán manuais didácticos de autocompostaxe, nos que se detalla toda a operativa a seguir para que o compost final obtido sexa de alta calidade e cumpra cos requisitos normativos, técnicos de Sogama, en coordinación co propio concello, impartirán unha sesión formativa presencial, en datas a acordar polas partes, para explicar á veciñanza a dinámica a seguir: onde colocar o composteiro, que depositar e que non depositar no mesmo, como conseguir unha mestura homoxénea e equilibrada entre fracción húmida e seca, que parámetros deben ser vixiados para lograr un resultado final exitoso, e que aplicacións pode ter o compost resultante.
A día de hoxe, xa son un total de 483 as entidades adscritas ao programa de compostaxe doméstica de Sogama, das cales 233 son concellos, 218 centros educativos e 32 colectivos sociais, tendo repartido a Sociedade entre todas elas un total de 23.300 composteiros.
Saúdos, Departamento de Comunicación
