• Con esta acción formativa, a empresa pública pretende trasladar aos docentes a importancia da educación ambiental como elemento transversal no currículo académico e como ferramenta prioritaria na transición cara á economía circular
• Cunha duración de 30 horas lectivas, o curso impártese través de PLATEGA (Plataforma de Teleformación Galega)

Cerceda, a 15 de febreiro de 2024.- Baixo o título “Pechando o Círculo: a Educación Ambiental do Século XXI”, Sogama deu comezo a un novo curso en liña, orientado ao profesorado dependente da Xunta de Galicia, tanto de Infantil e Primaria, como de Secundaria.

O obxectivo desta formación é trasladar aos docentes a importancia da educación ambiental como elemento transversal no currículo académico e como ferramenta fundamental na transición cara á economía circular.

Módulos temáticos

Cunha duración de 30 horas lectivas, esta acción formativa desenvólvese, do mesmo xeito que en edicións anteriores, a través de PLATEGA (Plataforma de Teleformación Galega), xestionada polo CAFI (Centro Autonómico de Formación e Innovación, adscrito á súa vez á Consellería de Cultura, Educación, Formación Profesional e Universidades).

Ao longo do curso abordaranse 10 módulos temáticos cos que se pretende trasladar ao profesorado os conceptos básicos vinculados á educación ambiental, así como os recursos que lles permitan, desde as aulas, contribuír a un mundo mellor

1.- A educación ambiental: concepto, proxección e alcance.

2.- Da economía lineal á economía circular: o reto dunha sociedade circular.

3.- A figura do educador ambiental: competencias, habilidades e aptitudes.

4.- Consumo responsable, consciente e informado.

5.- Loita contra o cambio climático desde o coñecemento e as boas prácticas.

6.- As ecoescolas: un paso adiante na construción dun futuro sostible.

7.- Xestión responsable dos residuos municipais. Pormenores do modelo Sogama e o seu labor en Galicia.

8.- Programa de educación ambiental no sistema Sogama.

9.- Deseño de accións ambientais e materiais didácticos de referencia.

10. Hora de actuar: cara a unha sociedade da sostibilidade.

A avaliación realízase a través de probas tipo test e culmina cunha actividade práctica obrigatoria baseada no principio europeo das tres erres (redución, reutilización e reciclaxe) e a súa aplicación nos centros escolares.

A plataforma a través da cal se imparte o curso, conta cun foro específico no que os participantes poden deixar constancia das súas observacións, dúbidas, preguntas e experiencias, e mesmo expor cuestións a debater co fin de enriquecer os contidos.

Preto de 1.000 participantes

Con este son 19 os cursos en liña impartidos por Sogama, que dirixiu, non só a docentes, senón tamén a alcaldes, concelleiros e técnicos de concellos, ademais de membros das Forzas de Seguridade, sendo a súa pretensión proporcionar, ampliar ou reforzar os coñecementos ambientais dos participantes, que a día de hoxe suman preto dun milleiro.

Saúdos, Departamento de Comunicación