• O 90% dos residuos de envases de vidro que se recuperan en España son recollidos a través do iglú verde e separados en orixe, o que garante a gran calidade da reciclaxe, logrando o modelo máis eficaz, eficiente e sostible ambientalmente

Cerceda, a 26 de febreiro de 2024.- Segundo a estimación de Ecovidrio, a peche de 2023, a taxa de reciclaxe de envases de vidro no noso país sitúase xa nun 70,1%, de acordo cun novo método de cálculo máis esixente (que elimina impropios e mermas). Así, España superou, con dous anos de antelación, os ambiciosos obxectivos establecidos por Europa para 2025 respecto da fracción vidro

En base a estas cifras, en España recíclanse xa 8,6 millóns de envases ao día e uns 6.000 envases por minuto nos iglús existentes en todo o territorio. En concreto, en 2023, cada cidadán depositou 19,2 Kg de vidro, o equivalente a 66 envases por persoa.

O 90% do residuo de vidro do noso país provén do iglú verde e recíclase ao 100% e infinitas veces, destinándose á fabricación de novos envases.

Ademais de todo o vidro depositado nos contedores verdes polos cidadáns, Ecovidrio recuperou, de forma complementaria, 74.054 toneladas de residuos de envases de vidro que non foron correctamente separadas en orixe e que puideron recuperarse nas 26 plantas de Residuos Urbanos presentes en todo o territorio nacional. Desta maneira, púidose recuperar todo ese material para reintegralo no ciclo produtivo e evitar que rematase en vertedoiro.

 Liderado e innovación: cara ao residuo cero

A entidade, no marco do seu Plan Estratéxico de Transformación Dixital, valeuse das súas máis de dúas décadas de experiencia e das súas avanzadas capacidades tecnolóxicas para identificar zonas prioritarias de actuación cun potencial de recollida extraordinaria. Así, en 2023, Ecovidrio puxo en marcha campañas adaptadas e ultra segmentadas en case 30 municipios, chegando a máis de 150.000 vivendas, cuxos resultados permitiron rexistrar incrementos de máis do 100% na recollida selectiva desas zonas.

Ademais, a hostalería continuou sendo un piar estratéxico de actuación. Grazas ao plan EcoVares, só o pasado ano, Ecovidrio visitou a máis de 100.000 establecementos hostaleiros e investiu preto de 26 millóns de euros na posta en marcha de plans operativos deseñados especificamente para o sector en cada municipio, levou a cabo máis de 600 campañas en colaboración cos concellos, formación ambiental, instalación de novos contedores e a entrega de medios gratuítos adaptados ás necesidades específicas do sector.

No seu afán por avanzar cara ao residuo cero, Ecovidrio aplicou técnicas innovadoras para, en 2023, extraer 9.175 toneladas de residuos de envases de vidro procedentes do rexeitamento e as mermas que se producen no proceso de tratamento. Se ben este material non dispón da calidade necesaria para ser reincorporado como materia prima secundaria na fabricación de novos envases, é moi apto e axeiado para usos industriais tales como áridos na construción, chorreo de barcos, filtros de piscina ou outras aplicacións ornamentais.

Beneficios da reciclaxe de vidro

Durante o 2023, grazas á reciclaxe de vidro, logrouse:

• Evitar a emisión de case 579.036 toneladas de CO2 á atmosfera, o que equivale a dar 147 voltas ao mundo en avión polo ecuador da Terra.

• Aforrar 713.013 MWh de enerxía, o que equivale ao consumo enerxético dos hospitais de toda España durante 2 meses.

• Evitar a extracción de máis de 1 millón de toneladas de materias primas, o que equivale a case 4 veces o peso do Empire State

Fonte e imaxe: Ecovidrio