• Remitirán aos asociados material divulgativo no que se explica que tipo de refugallos se xeran nun taller de automóbiles, como deben almacenarse, a quen deben entregarse e cal é a documentación preceptiva e necesaria para garantir o seguimento.
• Trátase de documentos básicos de consulta que permitirán aos talleres resolver dúbidas e contribuír activamente a unha xestión dos residuos máis eficiente e respectuosa co medio ambiente.

Cerceda, a 21 de maio de 2019.- A Federación Española da Recuperación e a Reciclaxe (FER) e a Confederación Española de Talleres de Reparación de Automóbiles e Afines (CETRAA) lanzaron conxuntamente unha campaña a través da cal pretenden informar, formar e concienciar aos talleres sobre a importancia crucial que ten xestionar de forma correcta e sostible os residuos xerados nas instalacións onde se levan a cabo labores de reparación e mantemento.

Desta forma, remitirán aos asociados material divulgativo que tomará a forma de carteis e trípticos a través dos cales se explica con precisión que tipo de refugallos se xeran nun taller de automóbiles (tanto perigosos como non perigosos), como deben almacenarse, a quen  deben entregarse e cal é a documentación preceptiva e necesaria para garantir o seguimento dos mesmos.

Trátase de documentos básicos de consulta que permitirán aos talleres resolver dúbidas e contribuír activamente a unha xestión dos refugallos producidos nos mesmos dunha forma máis eficiente e respectuosa co medio ambiente. Así o asegurou a directora xeral de FER, Alicia García-Franco, quen manifestou que o obxectivo  desta iniciativa é precisamente que “calquera taller poida coñecer o procedemento  correcto a seguir á hora de xestionar os residuos que produce e evitar desta forma posibles sancións derivadas do seu abandono ou vertido e da súa entrega a operadores ilegais”. Un posicionamento que comparte o responsable da Comisión de Medio Ambiente de CETRAA e membro do Comité Executivo, Xavier Freixes.

CETRAA agrupa a 28 asociacións provinciais do sector do mantemento e reparación do vehículo concentrando a preto do 70% dos talleres de reparación de vehículos en España.

Esta campaña dá continuidade a unha previa lanzada por FER a principios de ano sobre cumprimento normativo para o sector recuperador, evidenciando así os compromisos da patronal española da reciclaxe co máximo aproveitamento dos xa escasos e limitados recursos naturais e o desenvolvemento  sostible.

Fonte e imaxe: CETRAA

Saúdos, Departamento de Comunicación