• Lograr o obxectivo climático neto cero da Unión Europea para 2050 esixirá maiores accións en todos os sectores económicos, incluíndo aquelas relacionadas cos materiais e como os producimos, usamos, recirculamos e eliminamos

Cerceda, a 8 de marzo de 2024.- Segundo un recente informe da Axencia Europea de Medio Ambiente (AEMA), diminuír o consumo de materiais, reutilizar, reparar e reciclar a través de modelos de negocio circulares, pode contribuír a minorar as emisións de gases de efecto invernadoiro (GEI) e axudar a impulsar os esforzos de mitigación do cambio climático en Europa.

Se ben os países europeos xa están a emprender moitas iniciativas sobre xestión de residuos e economía circular, a organización entende que deberían ter en conta os potenciais aforros de emisións a partir das mesmas, xa que lograr o obxectivo climático neto cero da Unión Europea para 2050 esixirá maiores medidas en todos os sectores económicos, contemplando as relacionadas cos materiais e como os producimos, usamos, recirculamos e eliminamos.

O estudo analiza a forma en que os países europeos poden incluír mellores  accións de economía circular en xeral, e de xestión de residuos en particular, para acelerar a redución das emisións de gases de efecto invernadoiro (GEI) e mitigar o cambio climático, indicando que, polo xeral, as primeiras están subrepresentadas nas políticas e medidas climáticas nacionais informadas debido, en moitas ocasións, á súa complexidade intersectorial e á ausencia de directrices específicas para consideralas nos informes climáticos.

Se ben determinadas políticas e medidas de economía circular inclúense no 6% das políticas climáticas reportadas polos países europeos (cun forte enfoque nos residuos), os impactos que xerarían sobre a redución de emisións, rara vez se cuantifican.  E, aínda que as emisións totais de GEI do sector de residuos nos países europeos diminuíron un 42% desde 1990, e prevese que sigan diminuíndo, cunha redución esperada do 68% para 2050 en comparación cos niveis de 1990, o certo é que este sector representa aproximadamente o 3% das emisións GEI.

Fonte: AEMA

Imaxe: Pexels