• Convídase á poboación a vivir de maneira sostible e en harmonía coa natureza
• En 2022 cúmprense 50 anos da designación do 5 de xuño como Día Mundial do Medio Ambiente na Conferencia das Nacións Unidas sobre o Medio Humano en Estocolmo

Cerceda, a 24 de maio de 2022 – Baixo o lema “Unha soa Terra”, Suecia acollerá o Día Mundial do Medio Ambiente 2022, en alianza co Programa das Nacións Unidas para o Medio Ambiente (PNUMA).

A celebración terá lugar 50 anos despois da primeira Conferencia das Nacións Unidas sobre o Medio Humano de Estocolmo, na cal se acordou o establecemento do PNUMA e designouse o 5 de xuño de cada ano como o Día Mundial do Medio Ambiente.

“Unha soa Terra” foi o lema desa conferencia celebrada en 1972 e, transcorrido medio século desde entón, segue vixente: este planeta é o noso único fogar e é responsabilidade da humanidade salvagardar os seus recursos finitos.

Con esta consigna destácase a necesidade de vivir de forma sostible, en harmonía coa natureza, a través de cambios substanciais impulsados por políticas e eleccións cotiás que nos guíen cara a estilos de vida máis limpos e ecolóxicos.

Segundo o informe “Facer as paces coa natureza”, elaborado polo PNUMA e publicado a principios deste ano, transformar os sistemas sociais e económicos significa mellorar a nosa relación coa natureza, comprender o seu valor e poñer ese valor no centro da toma de decisións.

De acordo coa directora executiva do  PNUMA,  Inger Andersen, “en 2022 esperamos que o mundo comece a pasar a páxina do peor capítulo da pandemia de COVID-19. E facémolo co coñecemento de que continuamos enfrontando as tres crises planetarias que ameazan o noso futuro: a crise do cambio climático, a da perda da biodiversidade e a da contaminación e os refugallos".

Sobre o país anfitrión, Andersen dixo que "desde que foi sede da Conferencia das Nacións Unidas sobre o Medio Humano, fai cinco décadas, conseguiu avances significativos na protección do medio ambiente, incluíndo o obxectivo climático de lograr para 2045 as cero emisións netas, así como un balance negativo de emisións a partir de entón".

5 DE XUÑO

O Día Mundial do Medio Ambiente celébrase cada ano o 5 de xuño. É o día emblemático das Nacións Unidas para promover a conciencia e a acción mundial polo medio ambiente, converténdose, ao longo dos anos, na principal plataforma global para a divulgación pública ambiental, sendo conmemorado por millóns de persoas en todo o mundo.

Ademais, en 2022, o Goberno de Suecia acollerá a conferencia Estocolmo+50: un planeta san para a prosperidade de todos —a nosa responsabilidade, a nosa oportunidade, unha reunión internacional para conmemorar o 50º aniversario da Conferencia de Estocolmo de 1972, acelerar a implementación da Axenda 2030 e lograr unha recuperación sostible da COVID-19.

Fonte: ONU Medio Ambiente