• Así o pon de manifestó a empresa con motivo da conmemoración do Día Mundial da Educación Ambiental, que se celebra mañá, 26 de xaneiro
• Se en 2014 pasaron polo Complexo cercedense un total de 3.112 visitas, esta cifra elevouse a 4.620 en 2024
• A Sociedade pública enxalza a gran acollida que, ao longo dos anos, tivo este programa educativo como máximo expoñente da súa política de transparencia e do que se puideron beneficiar preto de 86.000 visitas
• Con esta iniciativa, tiveron a oportunidade de ver e comprobar por si mesmas o tratamento dispensado aos residuos municipais e constatar a importancia da colaboración cidadá para que estes sexan convertidos en recursos

Cerceda, a 25 de xaneiro de 2025.- As visitas externas ás instalacións de Sogama incrementáronse substancialmente durante os últimos 10 anos, concretamente nun 48,5%, pasando de 3.112 en 2014 a 4.620 en 2024.

En total, e dende a apertura das súas portas ao conxunto da sociedade, polo Complexo Medioambiental de Cerceda (A Coruña), pasaron preto de 86.000 visitas, interesadas en coñecer a actividade de Sogama e a xestión que seguen os residuos dende que entran na súa infraestrutura ata que saen da mesma convertidos en recursos.

Este programa, cualificado como máximo expoñente da política de transparencia desta empresa pública, contempla visitas de grupos organizados, para os que se deseñou un protocolo específico que ten en conta a idade, nivel educativo, formación específica e inquietudes.

A seguridade, máxima prioridade

En todos os casos, o responsable do grupo visitante debe cumprimentar e validar unha serie de formularios nos que Sogama deixa constancia das normas de seguridade, que deben ser comunicadas a todos os integrantes do colectivo, itinerarios a seguir, datos de acceso ás instalacións, así como calquera outra información a ter en conta. Todo isto en formato dixital, rexendo unha operativa na que se prima a coordinación entre todas as partes e se garante a máxima seguridade dos visitantes.

Precisamente, e atendendo ás medidas de prevención que rexen o programa de visitas, unicamente poderán acollerse ao mesmo os maiores de 9 anos. Dende esta idade, e ata os 18 anos, realizan un itinerario virtual con lentes inmersivos 360º a través dos cales poden coñecer a operativa de Sogama e o tratamento que se dispensa aos residuos sen moverse do sitio, tendo tamén a opción de desprazarse en autobús polas distintas plantas que conforman o Complexo. A partir dos 18 anos, ademais da visita virtual, os visitantes teñen a oportunidade de realizar un percorrido guiado a pé.

Os grupos son atendidos por educadores ambientais especializados en residuos, que adaptan aos visitantes os recursos didácticos utilizados, as explicacións e mesmo os tipos de xogos cos que teñen a oportunidade de poñer a proba os seus coñecementos.

 Cualificación de sobresaliente

 Ao finalizar a xornada, e de cara a posibles melloras, os que así o desexen poden cumprimentar, con carácter anónimo, un cuestionario en liña no que avalían todos os pormenores da visita, dende os contidos transmitidos ata as atencións recibidas polos monitores.

As valoracións do programa de Sogama sempre foron moi positivas, cunha puntuación media de 4,8, nun baremo de 0 a 5. Destácase especialmente a organización, a coordinación, o enfoque didáctico e/ou técnico, e as atencións recibidas en todo momento.

Reorientar hábitos e comportamentos

Dada a boa acollida deste programa, a Sociedade pública quere poñelo en valor con motivo da conmemoración do Día Mundial da Educación Ambiental, que terá lugar mañá,, 26 de xaneiro, chamando a atención sobre a necesidade de explicar, mostrar e interactuar cos distintos colectivos sociais dende a transparencia para conseguir reorientar hábitos e comportamentos cara á protección do medio ambiente.

A pretensión última é que a cultura da corresponsabilidade se estenda á poboación para que os residuos que todos producimos cada día reciban a mellor xestión posible: dende a súa separación no fogar e depósito segregado dos mesmos nos distintos contedores de recollida selectiva, ata o seu tratamento final, posibilitando, por parte de Sogama, a reciclaxe da parte susceptible de seguir este camiño, e valorizando enerxeticamente a non reciclable a fin de evitar a súa vertedura, a opción máis nociva para a contorna e a saúde.

Saúdos, Departamento de Comunicación