- Co nome ‘Redes para o cambio’, a XI edición desta iniciativa, promovida por Ecovidrio, contou coa participación de Climabar, Blondiemuser e Rafa Magaña, CEO de Mazinn
- O obxectivo de #VidriosYBarras é crear un espazo de diálogo e un punto de encontro entre os expertos da entidade e os bloggers e influencers do sector ambiental, abordando distintas temáticas tales como os retos da reciclaxe, a xestión de residuos, o desenvolvemento sostible e a educación ambiental, entre outras
Cerceda, a 3 de marzo de 2023.- Co título “Redes para el cambio”, Ecovidrio celebrou a XI edición de #VidrosyBarras, contando coa participación dos eco-influencers Belén Hinojar e Carmen Huidobro, creadoras de Climabar; Paula Blondie, creadora de Blondiemuser; e Rafa Magaña, CEO de Mazinn, quen analizou o papel das redes sociais na loita contra o cambio climático.
Nun contexto no que as formas de comunicar sobre sostibilidade e medio ambiente cambiaron, as redes sociais ofrecen a oportunidade de concienciar sobre o cambio climático e outros problemas ambientais de forma amena e didáctica. Durante o encontro, os participantes reflexionaron sobre as novas formas de facer divulgación e sobre o potencial das redes sociais como xeradoras do cambio.
Belén Hinojar e Carmen Huidobro, fundadoras de Climabar, explicaron como buscan concienciar sobre a emerxencia climática baixo un prisma diferente e próximo. Así, ambas compartiron os formatos que utilizan e analizaron as claves para comunicar e chamar a atención da audiencia dun modo creativo e con novos formatos para conseguir que cale a mensaxe a favor do medio ambiente. Desde Climabar insisten en que é necesario “romper a burbulla verde e chegar a toda a sociedade, non concienciar só aos que xa están concienciados”. Así mesmo, as fundadoras de Climabar aplaudiron a política pioneira contra a desinformación climática da plataforma dixital Pinterest.
Pola súa banda, Rafa Magaña, CEO de Mazinn, reflexionou sobre como conectar coa xeración Z, unha xeración con novos referentes e que aínda ten moito percorrido en materia de concienciación co medio ambiente. Neste sentido, puxo en valor a importancia de entender as características e a linguaxe propios de cada rede social á hora de crear contido para poder conectar realmente cos distintos perfís de audiencia.
Por último, Paula Blondie, creadora da conta de TikTok Blondiemuser, analizou como se pode traspasar a pantalla para, a través das redes sociais, lograr unha acción colectiva real, algo que busca conseguir a través das súas mensaxes de defensa da natureza e dos consellos que dá aos seus seguidores. A través do seu lema ‘Pequenos grandes cambios’, explicou como conecta coa súa comunidade para concienciar “sen abafos, sen eco ansiedade”, destacando a importancia dos pequenos xestos a favor do planeta e apostando por unha comunicación empática e non alarmista.
ESPAZO PARA O DIÁLOGO E O DEBATE
#VidriosYBarras é unha iniciativa de Ecovidrio que ten por obxecto crear un espazo de diálogo e un punto de encontro entre os expertos da entidade e os bloggers e influencers do sector do medio ambiente.
A pretensión de cada edición é fomentar o diálogo e xerar debate sobre os retos da reciclaxe, a xestión de residuos, o desenvolvemento sostible e a educación ambiental, entre outros temas.
Fonte e imaxe: Ecovidrio
